Astelehen honetako (ekainak 20) Nafarroako Aldizkari Ofizialak Garapen Ekonomikorako Departamentuak abian jarritako laguntzen lerro berria argitaratu du honako xede honekin: enpresa, teknologia-zentro eta prestakuntza-zentro publiko edo pribatuen arteko lankidetza finkatu eta sustatzea eskualdeko lehiakortasuna nahiz berrikuntza handitzeko bide gisa. 255.000 euro bideratuko dira, eta aurkezteko epea irailaren 1ean amaituko da.

Kluster, aurrekluster eta enpresen lankidetzako proiektuetako gastuetarako diru-laguntza lau onuradun-motari zuzenduta dago: jadanik sortutako klusterrei, osatze fasean dauden beste batzuei, lankidetza proiektuak abian jartzen ari direnei eta, azkenik, Foru Komunitatetik at kokatutako klusterrekin bat egiteko beharra duten enpresei.

"Klusterra sortzeko" A lerroak azaroaren 15a baino lehen erakunde berri laguntzaileak osatzeko jarduerak diruz lagunduko ditu (plan estrategikoak, dinamizazioa eta osaera). 16.000 euro emango da gehienez eskaera bakoitzeko.

Klusterra funtzionatzeko B lerroak kudeaketa-egitura babestuko du (bazkideak bereganatzea, lan-mahaiak, taldeko kudeaketa, ordezkaritza, proiektuak hautematea), plan estrategikoak eguneratzea, marketin eta komunikazioko ekintzak eta aholkularitza nahiz prestakuntzako zerbitzuak. 40.000 euroko diru-laguntza emango da gehienez eskaera bakoitzeko.

C lerroa enpresen ahalmen berritzailea eta lehiakortasuna indartzeko da lankidetzako proiektuak sustatuz, eta honako hauen alde egiteko: bazkideen arteko lankidetza (produktuen edo zerbitzuen dibertsifikazioa, I+G+B), klusterrerako zerbitzu estrategikoak, enpresako spin-off sortzea… 40.000 euro da gehieneko diru-laguntza.

Azkenik, D lerroak, Nafarroakoak ez diren klusterretara egindako atxikitzearekin lotuta, produktu eta merkatuen lehiakortasun, berrikuntza edota dibertsifikazioa hobetzen laguntzen duten erakundeekin bat egitea erraztu nahi du. Nafarroako Gobernuak kuota diruz lagunduko du, gehienez 1.000 eurorekin.

Lerro bakoitzeko laguntza bat eskatu ahalko da soilik. Deialdian lerro bakoitzean diruz lagundu daitezkeen gastu-motak eta -mugak zehazten dira, eta baita laguntzen intentsitatea ere, proiektuaren finkatze nahiz motaren arabera dagoena. Klusterraren sorreraren lehen faseetan intentsitatea handiagoa da.

Ebaluazioa banaka egingo da, eta babes finantzarioa ekimenek Nafarroako Espezializazio Adimentsuaren Estrategiak (RIS3-Navarra) lehenetsitako arlo ekonomikoetan duten kokapenaren araberakoa izango da, hiru ardatzen baitan batzen direnak: osasunaren ekonomia, ekonomia berdea eta talentuaren ekonomia.

Proposamenen balorazioan Sodena sozietate publikoarekin batera Gobernuak Nafarroako Gobernuko klusterren politikan duen egokitzapena kontuan hartuko du, eta egoera hori oinarrietan zehaztuko da; haren barnean sartzen dira ondorengo faktoreak: berritzeko eta nazioartekotzeko gaitasuna, azpiegitura eta zerbitzu partekatuak sortzea, epe ertainerako errentagarritasuna, autofinantzaketa, inportazioen ordez Nafarroan eskaintzen diren produktuak eta zerbitzuak sustatzeko politika, eskualdez gaindiko sareetan parte hartzea, prestakuntzaren aldeko apustua…

Beste gai gatzuk ere baloratuko dira, adibidez: klusterren ordezkaritza (kideak, enplegua, fakturazioa…), unibertsitate edo teknologia-zentroetako kudeaketan dagoen partaidetza eta hazkundearen ahala.