Nafarroako Gobernuak Iruñeko eta Iruñerriko herritarrei gomendatu die, Sanferminetan osasun arretaren beharra izanez gero, beraien osasun-zentrora joan daitezela 08:00etatik 15:20 arte zabalik izango baitira, eta ordutegi horretatik kanpo ospitalez kanpoko larrialdi puntuak erabil ditzatela; ahal den neurrian, Nafarroako Ospitaleguneko Larrialdietara ez joatea eskatzen da, bertako jarduera kasu larrietan oinarritu nahi baita, haiek artatzera.

Osasun kontseilari Fernando Dominguez izan da gaur goizean Sanferminetako dispositibo bereziko kideek egindako bileraren buru. Bertan izan dira, Osasun Departamentuko arduradunez gain (NOZ-O eta Nafarroako Ospitaleguneko kudeatzaileak, Ospitaletako Larrialdi zerbitzuetako arduradunak, Ospitalez kanpoko Larrialdiak, Lehen Mailako Arreta eta zezen-plazako arreta medikua, besteak beste), Barneko Zuzendaritza Nagusiko, Komunikazioko Zuzendaritza Nagusiko, Iruñeko Udaleko Herritarren Segurtasun Arloko, DYAko eta Gurutze Gorriko ordezkariak.

Lehen Mailako Arreta sareari dagokionez, Iruña eta Iruñerriko osasun-zentroek (Antsoain, Barañain, Berriozar, Burlata, Sarriguren, Atarrabia eta Zizur Nagusia) egunero irekiko dute, 08:00etatik 15:20 arte, ostegunean, hilak 7, eta asteburuan izan ezik (9 eta 10); egun horietan itxita egongo dira.

Egunotan behar diren ohiko osasun-arretak herritar bakoitzaren ohiko osasun-zentroan eskatu beharko dira.

Osasun-zentroen irekiera-ordutegitik kanpo, larrialdiak Ospitalez kanpoko Larrialdi Zerbitzuak artatu beharko ditu ondorengo zentroetan:

- Egunero, 15:00etatik 20:00ak arte, Ermitagaña eta Arrotxapeako osasun-zentroetan (Iruñean biak) eta Burlatan. Uztailak 7, 9 eta 10ean, zentro horiek 08:00etatik 20:00ak arte irekiko dituzte ateak.

- Egunero 24 ordutan, festa-egun guztietan, San Martin Doktorea anbulatorioan (San Fermin kalea, 29), eta urtebete gehiagoz, erreferentziako zentro bihurtuko da haien esparruan dauden helduen osasun-larrialdiak artatzeko. Zentro honetako larrialdiko pediatria-arreta lanegunetan 15:00etatik 20:00etara egingo, eta jaiegunetan 08:00etatik 20:00etara.

Zentro horretan, Ospitalez kanpoko Larrialdi Zerbitzuak laguntza-puntu bati eutsiko dio normalean, eta jaietan indartu egingo da mediku, erizain eta administrari banarekin, asteazkenetik, hilak 6, 08:00etatik ostiralera arte, uztailak 15, 08:00ak arte etenik gabe zabalik izan dadin.

Iruñeko eta Iruñerriko osasun-garraio sareari dagokionez, indartu egingo da. Normalean, bizi-euskarri aurreratuko 3 anbulantzia (SVA), oinarrizko bizi-euskarriko beste lau (SVB) eta medikalizatutako helikoptero bat daude, baina jaietan indartu egingo da SVBko 2 anbulantziarekin eta laguntzeko beste ibilgailu batzuekin; asteburu guztian, berriz, SVBko beste bi anbulantzia gehiago izango dira.

Entzierroetako zaurituak artatzeko dispositibo berezia honako hauek osatuko dute: hesian bertan dauden osasun-arretako 9 postuk, medikuekin, erizainekin eta sorosleekin, eta sorosleak dituzten laguntzeko beste 8 puntuk. Entzierroan 848,6 metro korritzen dira, eta 53 metro bakoitzeko ia sorospen-puntu bat izango da. Arreta-dispositibo guztia 112-SOS Navarra Zentroak koordinatuko du.

Postu horiek jarriko dira. Santo Domingoko aldaparen hasieran (Hezkuntza Departamentuaren egoitza), Nafarroako museoko eskaileretan, Santiagoko plazan (udaletxearen atzealdea), San Saturninoko eskaileretan, udaletxean (2), Merkaderes kalean (2), Xabierko jaitsieran (2), Espoz eta Minako zeharbidean, Ahumadako Dukean, Labriteko jaitsieran, Nafarroako Gorteetan ("Telefonica" edo hegoaldeko kailejoia) eta Hemingway- en (iparraldeko kailejoian).