Foru Gobernuak atzo, asteazkena, egindako bileran 2015. urteari dagozkion Nafarroako Kontu Orokorrei buruzko Foru Legearen proiektua onartu zuen, eta ekitaldi hori amaitu zen batez beste 6.111 euro gastatuz biztanle bakoitzeko, 2014an baino % 2,9 gehiago. 3.913 milioi gastatu zuen guztira, eta zati handiena osasunean eta hezkuntzan inbertitu zen.

Kopuru horretatik, 1.496 euro pertsonako, osasun-laguntzak asebetetzeko erabili ziren; Estatuari ordaintzeko, Hitzarmen Ekonomikoa betearaziz (956 euro), Hezkuntzarako (906 euro), gizarte-zerbitzuetarako (401), toki-erakundeekin sinatutako hitzarmenetarako (369 euro), azpiegituretarako (211) eta I+G+Brako (81 euro).

Gorago esan den moduan, zenbaki absolutuetan foruko diru-kutxek 3.913 milioi euro gastatu zuten. Ahalegin handiena eremu sozialean egin zen (1.828 milioi), eta kopuru horretatik osasunean 959,8 milioi inbertitu ziren (% 24,5), hezkuntzan 582 milioi (% 14,78) eta politika sozialetan 286,3 milioi (% 7,3).

Likidatutako eskubideak, 3.856 milioi euro, diru-sarreren finkatutako aurrekontuaren % 97,3 bete dela esan nahi du.

Foru Komunitateak duen zor guztiari dagokionez, 2015eko abenduaren 31n 3.323 milioi izan ziren, 2014an, berriz, 3.197 milioi, hau da, % 3,9 hazi da. Hala, biztanle bakoitzeko zorra 5.187 milioi izan zen.

Diruzaintzako geldikinak 238 milioi euroko saldo negatiboa izan du; 2014an, berriz, 113 milioikoa izan zen.

Zerga-bilketa zuzenaren bidez 1.467 milioi euro jaso ziren, hau da, aurreko ekitaldian baino 39,7 milioi gehiago. Alde batetik, errentaren gaineko zerga zuzenek (PFEZ eta Sozietateak) bilakaera positiboa izan zuten, eta aurreko urtean baino 16,8 milioi gehiago jaso zuten (11,1 milioi eta 5,7 milioi, hurrenez hurren). Bestalde, kapitalaren gaineko zergek (Ondarea eta Oinordetzak) likidatutako eskubideak 1,1 miliotan igo zituzten aurreko urtearekin alderatuz. Gainera, zerga berri bat aplikatu zen, loterietako sariei dagokiena, eta haren gainean 18,88 milioi euroko eskubideak sortu ziren.

Bestalde, zeharkako zergek sortutako zenbatekoa 1.641,9 milioi euro izan da guztira, hau da, aurreko ekitaldian baino 55,48 milioi gehiago.