2017-2019ko II. Gazteria Planaren lanketaren lehen fasetik sortutako zirriborroa aurkeztu da gaur goizean, prentsaurrekoan. Agiri horrek 150 ekintza baino gehiago jasotzen ditu, sustatzaileen hitzetan, "proposamen integral eta zeharkakoa" da, eta "gazteriaren garapena errazteko helburuarekin" osatu da, "baliabideak eta aukerak emanez haien emantzipazioa eta banakako nahiz taldekako garapena errazte aldera". Nafarroako Kirolaren eta Gazteriaren Institutuko zuzendari kudeatzaile Ruben Goñik eta Gazteriako zuzendariorde Adela Gonzalezek agiriaren ildo nagusiak aurkeztu dituzte.

Planaren diseinuaren oinarria Gazteriaren Foru Legea da, eta hark gazteen autonomiaren alde egiteko agintzen du berdintasunezko gazteria-politikak sustatzeko, honako hauek bermatuko dituztenak: norberaren garapenerako baldintza onenak, gazteen sustapena eta partaidetza soziala, gazte konprometituak, arduratsuak, osoak eta aktiboak lortzeko helburuarekin.

Programa-akordioak eta 2015eko gazteriaren diagnostikoak, halaber, bideratu dute zirriborro honen lanketa, ekainaren 30ean aurkeztu zen Departamentu arteko Batzordeak egindako bilera batean eta dagoeneko eskuragarri dago Gobernu Irekiko webgunean herritarrek kontsulta ahal dezaten.

Lanketa egiteko gazteen iritziak jaso ondoren, ondorengo eskaerak hauteman ahal izan ziren: prestakuntza eta informazio gehiago, laguntzen eta diru-laguntzen falta, genero-berdintasunaren aldarrikapena eta aisialdi osasungarria ahalbidetzea.

Gazteekin egindako inkesten eta tailerren bidez lortutako erantzunetatik abiatuz eta mahai teknikoek egindako ekarpenetatik abiatuz, zirriborroak 150 bat ekintza jasotzen ditu, eta lau ardatzetan antolatu dira:

-Emantzipazioa: enplegua, etxebizitza, hezkuntza.
-Banakako prozesua: osasuna, kultura eta kirola.
-Sozializazio-prozesua: partaidetza, bizikidetza, aisia eta astialdia eta mugikortasuna.
-Banakako eta taldekako identitatea garatzea: aniztasuna, gizarteratzea, berdintasuna eta lurralde-garapena.

Prozesu parte-hartzaileak Gazteria Planaren II. fasean izango du jarraipena, eta bertan Eskualdeko Foroak deituko dira (zortzi Nafarroako zenbait eskualdetan), planaren proposamenaren kontsulta errazteko asmoz. Topaketa horiek irailean eta urrian egingo dira Irurtzunen, Lekarozen, Lizarran, Tafallan, Tuteran, San Adrianen, Zangozan eta Iruñean.

Gainera, mahai teknikoen sektoreko bilerak sustatuko dira, eta hainbat ardatzetako berariazko gaiak jorratuko dituzte; eztabaida bat egitea beharrezkotzat jotzen den gaien gainean herritarrei irekitako saio erabakitzaile bat antolatuko da, eta partaidetza publikoko prozesuan lortutako emaitzak itzultzeko fase bat programatuko da, Gazteriaren Zuzendariordetzako webgunean argitaratuko den tarteko txosten batean jasoko direnak.

Horrek guztiak II. Gazteria Plana behin betiko onartzea ekarriko du, abendurako iragarria, nahiz eta hark izaera malguari eutsiko dion, eta hiru urteetan zehar eguneratu ahalko da.