Nafarroako Gobernuak, gaurko bileran, Foru Gobernuaren Europako Ekintza Plana onartzea erabaki du. Plan horren helburuak dira, batetik, Nafarroako erakundeen presentzia sendotzea Europako instituzio eta erakundeetan; bestetik, erakunde nafarrek EBko funtsak errazago lortzea; eta azkenik, Foru Komunitatea kanpoan sustatzeko estrategia babestea.

Bruselako Ordezkaritzaren lanerako egin den era horretako lehen plana da. Plan horri esker, Ordezkaritzak gauzatzen dituen ekintzak neurtu eta kuantifikatuko dira.

Gobernuak Kontuen Ganberak esandakoa bete du. Izan ere, Ganberak Ordezkaritzari buruzko txosten bat egin zuen joan den urtarrilean, eta azaldu zuen ekintzak ebaluatzea zaila zela, Ordezkaritzak ez zuelako helburu kuantifikaturik eta ezta jardueren eraginkortasuna ebaluatzeko adierazlerik ere.

Plan hori garrantzitsua da, hain zuzen ere, Ordezkaritza ez ezik Gobernua, unibertsitateak, enpresak, gizartea eta era guztietako elkarteak lotesten dituelako.

Alde horretatik, nabarmendu beharra daukagu plana partaidetza publikoko prozesu baten bidez egin dela, eta inplikatutako agenteek eta herritarrek, oro har, parte hartu dutela.

Planak ez du gastu zuzenik, aurrekontua eskura dagoenean baino ez delako egikarituko

Nafarroako erakundeen presentzia sendotzea Europako instituzio eta erakundeetan

Oinarrizko ekintzen xedea da Gobernuko Departamentuen eta Nafarroako Gobernuaren Bruselako Ordezkaritzaren (NGBO) arteko harremana koordinatzea, eta, horretarako, Europako Gaien Departamentuarteko Koordinazio Batzorde bat sortzea. Batzorde horretan informazioa emango da eta Foru Gobernuaren EBko jarduera koordinatuko da.

Gainera EB intraneta sortuko da, Departamentuek informazioa erraz eta arin eman diezaioten elkarri.

Erakunde nafarrek EBko funtsak errazago lortzea

Helburua da plan sektorialak koordinatzea eta Nafarroako Gobernuak ezarritako eskualde-garapeneko estrategia sustatzen gehien lagun dezaketen proiektuak zehaztea.

Gauzak horrela, NGBO, Gobernuko Departamentuak eta eremu publiko eta pribatuko agente eta erakundeak etengabe elkartzeko foroak sortuko dira, eskualdeko estrategia eta enpresa-babesaren arabera sektore zehatzak ezarriko dira eta foroentzako finantziazio-aukera zehatzen inguruko diagnostikoa egingo da.

Gainera, EBko programak ezagutzera emateko atari bat sortuko da, Bruselako deialdiei, sareei eta agendari buruzko informazioa zabaltzeko, gaien edo sektoreen arabera.

Halaber, Nafarroako erakundeak (zentro teknologikoak, enpresak eta unibertsitateak) kanpoan ezagutzera ematea eta posizionatzea bultzatuko da, hedapen-atari baten bitartez. Atari horretan Nafarroari eta erakunde horiei buruzko informazioa jarriko da (baliabideak, azpiegiturak, zerbitzuak, esperientzia), kanpoko erakundeek haien proiektuen bazkide potentzial gisa identifika ditzaten errazteko.

Nafarroa kanpoan sustatzeko estrategia babestea

Zehaztutako jarduerak dira, besteak beste, Bruselan enpresa-sustapeneko erakundeekin harremanak bultzatzea eta EBk lankidetza programak dituen inguruko herrialdeekin harremana erraztea (bazkide komertzialak aurkitzea, bisita-agendak antolatzea, azoketan parte hartzea eta Nafarroako kanpainak kanpoan aurkeztea).