Nafarroako Gobernuak 40.000 euroko diru-laguntza eman dio Ipes Elkartea Fundazioari "Emakumeen Liburutegia" dokumentazio-zentroa mantentzeko eta garatzeko aurtengo urtean zehar. Era horretan, Herritarren eta Erakunde Harremanetarako Departamentuko kontseilaria den Ana Ollok lankidetza-hitzarmena sinatu du gaur goizean IPES Elkarteko lehendakaria den Julia Munarrizekin.

Hitzarmenaren helburuak

Diru-laguntzaren helburuak hauek dira: Emakumeen Liburutegia mantentzea eta herritar guztiei Liburutegira jotzeko bidea erraztea; dagoen dokumentazioaren bidez, emakumeen egoeraren, pentsamendu feministaren, genero-azterketen eta emakumeek sortutako kulturaren (literatura, artea, zinema, komikia, e.a.) inguruko informazioa ematea, emakumeek bizitza sozialean, politikoan, kulturalean eta ekonomikoan parte-hartzea sustatuaz, eta emakumeen eskubideak lortzen aurreratzea; eta Ipes Elkartearen web orriaren eta sare sozialen bitartez kultur eta dokumentu ondare horren inguruan sentsibilizatzea, feminismoaren barnean joera ezberdinak erakutsiaz.

Horrez gain, emakumeek idatzitako literatura eta emakumeek kulturara egindako ekarpena hedatuko dira; zentroa bera, funtsak eta jarduerak hedatuko dira, egoitzan bertan nahiz modu birtualean; azkenik, gaikako bibliografiak egingo dira honako hauen inguruan: genero-berdintasuna, emakumeen egoera eta eskubideak, generoaren teoriak eta feminismoak, emakume sortzaileak, artistak, zientifikoak eta abar ezagutzera ematea eta horien jabekuntza.

Hitzarmenean, Nafarroako Berdintasunerako Institutuari (NBI) emandako eskumen batzuk osatzen dira; zehazki, Foru Komunitatean emakumeen egoeraren bilakaerari buruzko azterketak eta ikerketak egitearen ingurukoak nahiz emakumeen desberdintasun-egoeraren eta berdintasuna sustatzeko neurrien gainean sentsibilizatzeko jarduerak.

Ipes duela hainbat hamarkada hasi zen genero-ikuspegiko lehen ikerketa-lerroak lantzen. Nafarroan emakumeen inguruan espezializatuta dagoen liburutegi bakarra du. Nazioarteko mugimenduaren testuinguruan mugitzen da, eta, genero-azterketatik abiatuta, emakumeak jakintzaren diziplina guztietan kontuan hartzea proposatzen du, sormen kulturalean, zientifikoan eta artistikoan ekintza positiboak bultzatuaz eta emakume produktoreen, sortzaileen eta zientifikoen lana zabalduaz. Modu horretan, NBIrekin bat datorren informazioa, ezagutza eta helburuak partekatzen eta hedatzen ditu.