Datorren astelehenean, abuztuaren 15ean, 2016-2017 denboraldi zinegetikoa hasiko da Foru Komunitateko esparruetan, "debeku-erdiko aldia" irekiko baita; hau da, galeperrak eta usapal arruntak ehizatzeko aukera eskaintzen den denboraldia.

Espezie horiek ehizatu ahal izango dira abuztuaren 15etik irailaren 25era bitarte, ostegunetan, larunbatetan, igandeetan eta jai-egunetan. Galeperrarentzako eta usapal arruntarentzako kupoak ezarri dira, pertsonako eta eguneko hamar eta pertsonako eta eguneko bi, hurrenez hurren. Ehizatzeko ordutegia ondorengoa izango da: eguzkia atera baino ordubete lehenagotik hasi eta eguzkia sartu ondorengo ordubetera bitartekoa.

Nafarroako hegoaldeko barrutietan, soilik ehizatu ahal izango dira antolamendu zinegetikoko planetan horretarako gaitutako zonetan. Aldiz, iparraldean, debeku-erdiko aldia egin ahal izango da esparruetako lursail guztietan.

Halaber, astelehenean, hilaren 15ean, hasiera emango zaio untxiaren udaldiko ehizari, espezie horrek kalteak egin dituela justifikatzen duten barrutietan nahiz esparru guztian 3 ale edo gehiago egotearen indize kilometrikoak erakusten dituzten barrutietan. Ehizaldi horietarako, barrutiko zaintzaileak bertan egon beharko du, antolamendu zinegetikoko planean horretarako ezarritako guneetan burutu beharko dira, eta ehiza urriaren 2ra arte egin ahal izango da larunbatetan, igandeetan eta jai-egunetan. Horrela, aurrez Landa Garapen, Ingurumen eta Tokiko Administrazioaren Departamentuari jakinarazi beharko zaizkio ehiza-egunak, kalteen justifikazioa eta zaintzailearen kontratazioa.