Hitzaldian, Laparra lehendakariordeak Europako laguntza hau lortzea "Nafarroarentzat lorpen handia dela" esan du, era horretako deialdiak "oso lehiakorrak baitira aurkeztutako proiektuen ezaugarriak eta finantzaketa altua medio". Erreferentzia bezala, aurreko antzeko deialdietan, 130 proiektu baino gehiago aurkeztu ziren, eta horietatik soilik zati txiki bat hautatu zen. Kasu honetan, dagoen diruaren arabera, zazpi bat proiektu finantzatzea aurreikusten da; "beraz, aurkeztutako ekimen guztien gainean emandako diru-kopurua %5 ingurukoa da", Miguel Laparrak azaldu duenez.

Nafarroako proiektua Foru Gobernuak iazko urtearen amaiera aldera aurkeztu zuen Europako Batzordeak gizarte-politikako berrikuntza-programak finantzatzeko eta gizarte- eta enplegu-zerbitzuetako berrikuntzak bultzatzeko eskaintzen duen VP/2015/011 laguntza-deialdira. Aste honetan Batzordetik jakinarazi diete aurkeztutako eskaerak oso ondo gainditu duela ebaluazio-fasea.

Zehazki, Europar Batasunaren arabera, Nafarroako Gobernuak aurkeztutako proposamenak "garrantzi politiko handia du, zerikusi argia baitu Espainiarako gomendioekin eta lehentasun politikoekin EBeren seihileko testuinguruan, zehazki, enpleguaren eta gizarte-zerbitzuen arteko koordinazio-ezari eta gutxieneko diru-sarreren erregimenei dagokienean".

"Era berean -Ebaluazio Batzordeak jarraitu du-, proiektua berritzailea eta garrantzitsua da Europako ikuspegitik erreparatuta, kalitate altuko gizarte- eta enplegu-zerbitzuak, banako laguntza eta guzti, emateko frogatutako eredu berritzailea du-eta".

Horrez gain, nabarmendu du "esku-hartzearen onurak, errentagarritasun sozial eta ekonomikotik, neurtu egingo dira, eta kasua inbertsio sozial bezala kalifikatzeko ebidentziak egon badaude". Azkenik, beste alderdi batzuk ere positibotzat jo dira; esate baterako, ekintza gauzatzea, horren ebaluazioa, proposaturiko jarduerak, jarritako giza eta finantza baliabideak, aurrekontua eta agente publikoen eta pribatuen arteko elkartea.

Laguntza eskatu dutenen artean honako hauek aurkitzen dira: Nafarroako Gobernua, Gizarte Eskubideen Departamentuaren bidez; Nafarroako Enplegu Zerbitzua (erakunde autonomo gisa); Nafarroako Unibertsitate Publikoa; Tuterako Udala; eta Altsasuko, Olatzagutiako eta Ziordiko Oinarrizko Gizarte Zerbitzuen Mankomunitatea. Bestalde, ekimenean ondorengoek parte hartu dute: Nafarroako Gobernuko Gizarteratzeko eta Babes Sozialerako Zuzendaritza Nagusiak eta Errealitate Sozialaren Behatokiaren eta Gizarte Politiken Plangintzaren eta Ebaluazioaren Zuzendaritza Nagusiak, Estatuko Enplegu Publikoaren Zerbitzuak (SEPE), lan eta gizarteratzeko taldeak (EISOL), herri bakoitzeko gizarte- eta enplegu-zerbitzuek, Erriberako (AER) eta Sakanako (AES) enpresarien elkarteek, Gurutze Gorriak, ANAFEk, CCOOk, LABek, Eder Kontsortzioak eta Sakanako garapen-agentziak.

Proiektuaren bidez, Nafarroako Gobernuaren asmoa da, lan-merkatuan sartzeko aukera hobetzeaz gain, egoera ahulean eta langabezian aurkitzen den biztanleria artatzeko eredu berria diseinatzea eta ebaluatzea, gizarte- eta enplegu-zerbitzuek kasu bakoitza banaka eta modu koordinatuan aztertuta.

Modu berean, gizarteratzeko errentaren gainean egin daitezkeen berrikuntzak identifikatu eta egiaztatu nahi dira, babesa handiagoa eta administrazio-kudeaketa malguagoa, sinplifikatuagoa eta eraginkorragoa izan dadin.

Azkenik, enpleguko politika aktiboak planifikatzeko sistema berria jarri nahi da tokian-tokian, agente publikoak eta sozialak elkartuta; halaber, lortutako emaitzak ebaluatu nahi dira ondoren eremu horietan erabaki politikoak hartzeko; eta, amaitzeko, beste administrazioentzat baliagarriak izan daitezkeen irakasgaiak edo gomendioak atera nahi dira.

Ekimen honetan parte hartuko duten pertsonei haien premietara egokitutako ibilbidea eskainiko zaie; ibilbidea bi langilek egin eta gainbegiratuko dute: bata enpleguan esperientziaduna izango da eta bestea gizarte-zerbitzuetan aditua.

Parte-hartzaileak, Tuteran 400 eta Burundan 100, programan pixkanaka sartuko dira, eta irizpide ezberdinen arabera hautatuko dira; hala nola, iraupen luzeko langabeak izatea (urte bat eta 2 urte artean), talde ahuletakoak izatea (gazteak, 45 urtetik gorakoak, emakumeak, atzerritarrak, e.a.), gizarteratzeko errenta jasotzea, agortzear dagoen langabezia-subsidioren bat jasotzea, inolako prestaziorik ez jasotzea eta gizartetik baztertzeko arriskuan egotea, edo enplegua eskuratzeko arrazoizko gaitasuna izatea.

Horiek guztiek gizarteratzeko truke-akordioa sinatu beharko dute, eta, horren arabera, zerbitzu publikoak konpromisoa izango du epe zehatz batean pertsona bakoitzaren premien gaineko diagnostikoa eta gainbegiratua izango den prestakuntza-ibilbidearen eskaintza egiteko. Bestalde, onuradunak parte hartu beharko du haren premietara egokitutako eta adostutako ibilbide horretan.

Burutu ahal izateko, Nafarroako Gobernuak uste du babes soziala indartzeak (adibidez, gizarteratzeko errentaren bitartez), "ez duela eragin negatiboa izango enplegura itzultzean, aldi berean enplegua lortzea errazteko zerbitzuak indartzen eta egokitzen badira", prestakuntzaren kasua bezala.