Garapen Ekonomikorako Departamentuak abuztuaren 31ko Nafarroako Aldizkari Ofizialean industriako enpresa handien inbertsiorako laguntza-deialdia argitaratuko du; haren bidez, 2,5 milioi eurorekin nolabaiteko garrantzia duten produkzio-proiektuak diruz lagunduko ditu, hau da, 500.000 euroko gutxieneko aurrekontu batekin.

NAOn argitaratutako iragarkiarekin, Nafarroako Gobernuak era horretako sozietateetarako diru-laguntzak berreskuratzen ditu, 2012 amaieratik Foru Administrazioaren laguntza publikorik ez baitzuten.

Eskaera-epea irailaren 1ean irekiko da eta urriaren 30ean amaituko. Espedienteak iristen diren hurrenkeraren arabera ebatziko dira, aurrekontu-kreditua agortzen den arte. Eta proiektuek 2017ko ekainaren 30a baino lehen egikarituta izan beharko dute.

Zehazki, laguntzak establezimendu bat Nafarroan duten edo izango duten enpresa handietarako dira eta ondorengo jardueretakoren bat egiten dutenak: manufaktura-industriak, nekazaritza-elikagaien industriak salbu (LGENFek kofinantzatutako berariazko inbertsioetarako laguntza batzuek agintzen ditu); hondakinen kudeaketari eta tratamenduari edo kutsadura kentzeari lotutako jarduerak; informazioa eta komunikazioak; logistika, salgaiak eta garraioak; eta I+G. Baldintzen artean, enpresek gizon eta emakumeen arteko Berdintasun Plan bat izatea ageri da.

Nafarroan industriako 150 bat enpresa handi daude (250 langile gutxienez eta urtean 50 milioi euroko negozio-bolumena, gaingiroki). Foru Komunitateko industriako enpresen % 5 dira, baina sektoreko enpleguaren erdia ia.

Lehiakortasuna hobetzeko diruz lagundu daitezkeen gastuak, oro har, honako hauek dira: industria-erabilerako lurrak erostea, higiezinak eraikitzea edo hobetzea eta aktibo materialak nahiz immaterialak erostea.

Gainera, inbertsiorako laguntzetan dagoen berrikuntza modura, proiektuari lotutako prestakuntza ere diruz lagunduko da, modu osagarrian.

Diruz lagundu daitekeen aurrekontuaren % 10eko diru-laguntza izango da, eta gehieneko zenbatekoa proiektu-motaren (enpresa berria, dibertsifikazioa eta zabalkundea-hazkundea) nahiz kokapena araberakoa

Zehazki, enpresa berrietarako edo dibertsifikazio-jarduketetarako, 500.000 eurokoa izango da, baldin eta sozietateak dentsitate demografiko txikiko edo langabezia handiko guneetan kokatzen badira (2014-2020ko eskualdeko laguntzen mapa), edo 200.000 eurokoa gunea barnean ez badago. Enpresa zabaltzeko edo hazteko, 200.000 euroko muga izango da, nolanahi ere.