Laguntza programa, alde batetik, eskola-jazarpenaren arazoari erantzun orokor bat emateko beharrean oinarritzen da, eta bestetik, Bizikidetzarako Aholkularitzak fenomeno horren aurkako esku hartzean izandako ibilbidean, Hezkuntza Departamentuak 2005etik jorratzen duena hezkuntzako Aholkularitzaren eta Ikuskaritzaren bidez.

Hezkuntza Departamentuak fenomeno horri aurre egiteko era egokiena prebentzioa dela uste izan du betidanik, honako hauetan oinarritutako prebentzioa: komunikatzeko trebezien eta gatazken kudeaketaren garapena; emoziozko gaitasunak; aginpide demokratikoko estrategiak, eta errespetu nahiz enpatiako balioen hitzarmena bizikidetza-arauetan. Gaur egun aurrera pauso bat emateko beharra egiaztatu da, eta jazarpenari zero tolerantziako estrategia bat antolatzea.

Hezkuntzako iturriek adierazten dutenez, Laguntza proiektua ikastetxe estandar batean aplikatzeko prestatutako proiektu bat da, baina behar besteko malgutasunarekin planteatuta ikastetxe bakoitzak bere behar eta errealitateetara egokitu dezan. Alde horretatik, gida bat da ikastetxeek, bizikidetzarako batzordeen bidez, beraien prebentzio-proiektu propioa zehaztu dezaten edo esku hartu dezaten eskola-jazarpena dagoenean, ikasgela barnean nahiz kanpoan bere kontzientziazio-kanpaina egiteko askotariko aukerekin, bai eta eman beharreko pausoekin ere jazarpen-egoera bat hautematen denean.

Ikasturte honetan zazpi ikastetxek aplikatuko dute Laguntza programa Departamentuko Bizikidetzarako Aholkularitzaren laguntzarekin. Programaren aplikazioa ebaluatu ondoren, Nafarroako gainerako ikastetxeetara zabalduko da. Zentro bakoitzeko programaren koordinazioa prestatutako irakasleek egingo dute eta, horretarako, eskola-jazarpenari buruzko 35 orduko prestakuntza-ikastaro bat prestatu da; gai horretan interesa duten irakasleentzat da, eta bertako edukiek zentroan prebentzio, esku hartze eta sentsibilizazioko estrategiak dinamizatzeko gaitasunak emango dizkiote.

Hainbat azterketek adierazten dutenez, ikasleen % 3 eta % 5 artean dago eskola-jazarpena edo tratu txar larria eskolakideen aldetik. Save the Children erakundeak 2015ean egindako azterketan, Hezkuntza Departamentuak parte hartu zuen, fenomeno horrek apur bat gora egin duela ikus daiteke, eta Nafarroan % 5,9koa dela, hau da, autonomia erkidego guztiak aintzat hartuta, ehuneko txikiena. Iazko ikasturtean Bizikidetzarako Aholkularitzan 130 kasu erregistratu ziren.

2005ean sortua, Hezkuntza Departamentuko Bizikidetzarako Aholkularitzaren eginbeharrak, besteak beste, jazarpen-kasuetan ikastetxeak eta familiak babestea da prebentzioari eta esku hartzeari dagokionez. Indarrean dagoen legeriaren arabera, ikastetxeek bizikidetza-plan bat egiteko betebeharra dute, eta prebentzioa nahiz esku hartzea jasoko dira bertan, izan daitezkeen jazarpen-kasuen aurrean. Esku hartzeko protokolo bat dago, eta hura aplikatzeko, ikastetxeek Hezkuntzako Ikuskaritzaren eta Bizikidetzarako Aholkularitzaren laguntza dute. Hezkuntza-komunitateko kideren batek eskola-jazarpeneko kasu bat hautematen duenean, zentroko zuzendaritzari jakinarazten zaio formalki, eta azken horrek jazarpen-protokoloa aktibatzen du. Arazoaren identifikazioa jazarpen modura teknikoa izan behar da, eta profesional-talde batek egindako ikerketa-prozesu bat eskatzen du gertatzen den tokiaren testuinguruan.