Nafarroako Lehendakari Uxue Barkosek 2016-2017 ikasturte akademikoa inauguratu du gaur eguerdian NUPen. Ekitaldian, Nafarroako Gobernuaren eta unibertsitate-erakundearen arteko elkarlana nabarmendu eta honako hau adierazi du: "hezkuntza gure gizartearen pizgarrietako bat da, ikasleei ulertzen lagundu behar diegun gizarte eta mundu heterogeneoaren pizgarria, eta, alde horretatik, Nafarroako Unibertsitate Publikoak asko du emateko".

Bi erakundeen arteko elkarlanaren adibide "oso adierazgarri" bat jarri du, zenbait urterako hitzarmena prestatzen ari den batzorde teknikoan elkarrekin egin duten lana, hain zuzen ere.

Lehendakariak azaldu du, halaber, titulazioen mapa bat egiten ari direla, errealitate sozioekonomikoa eta arlo horretan jar ditzaketen baliabideak kontuan hartuta. "Nafarroako gizarteak eskatzen dituen titulazioen diseinuan aurrera egiten ari gara, aintzat hartuta beti, noski, eraiki nahi dugun gizarte globalaren proiektua". 

Hitzaldian, Barkos Lehendakariak gogoratu du legealdiaren lehen urte honetan deialdi ireki bat sortu dutela eta Nafarroako unibertsitate guztietako katedrek parte hartu dutela.

Beste alde batetik, Lehendakariak esan du Nafarroako Gobernuko Departamentuek Unibertsitate Publikoarekin elkarlanean aritzeko departamentuarteko sare bat sortu nahi dutela, unibertsitateko ikasleen prestakuntza ziurtatzeko, Administrazioko departamentuetan eta titulartasun publikoko enpresetan curriculumeko eta curriculumetik kanpoko praktikak antolatuz.

Ikerkuntzari dagokionez, Lehendakaria pozik dago; izan ere, "bost urteren ondoren, Hezkuntza Departamentuaren ikerkuntzarako laguntzen deialdia berreskuratu ahal izan dugu". Horren harian, nabarmendu ditu, batetik, Foru Komunitateak ikertzaileak babesteko Euraxess sare europarrarekin duen lotura berritu dutela; bestetik, Nafarroako Estatistika Planean Europako eragiketa estatistikoarekin uztartutako eragiketa espezifiko bat sartu dutela, I+G arlorako kreditu publikoak ezartze aldera; eta, azkenik, Europako Ekintza Plan bat egin dutela.

Azkenik, azpimarratu du NUPek zeregin handia duela "Nafarroako gizartearen garapenean eta adimen malgu, ireki, kritiko eta sortzaileko pertsonak prestatzen. Alde horretatik, Martha G. Nussbaum filosofo iparramerikarrarekin bat egin eta honako hau adierazi du: "hezkuntzak, makina erabilgarriak sortu ordez, beren kasa pentsatzeko ahalmena eta ikuspegi kritikoa dituzten herritar zentzudunak prestatu beharko lituzke, gizartea aldatzeko eta garatzen laguntzeko ahalmena dutenak, gizarteari bueltatzeko finantziazio publikoaren bitartez gizarteak haiengan inbertitu dutena".