Nafarroako Kirolaren eta Gazteriaren Institutuko (NKGI) zuzendari kudeatzaile Ruben Goñi Nafarroako kirol federazioekin bildu da gaur goizean honako hau jakinarazteko: Kultura, Kirol eta Gazteriako kontseilariak emandako irailaren 5eko 62/2016 Foru Agindua onartu dela. Haren bidez, Nafarroako 32 kirol-federaziok uztailaren 31ko 550/2015 Ebazpenaren aurka aurkeztutako gorako errekurtsoak ebazten dira; azken ebazpen horretan, diru-laguntzen deialdiaren azken likidazioa egiten zitzaien 2013ko Nafarroako 42 kirol federazioei, eta ordaindutako eta justifikatu gabeko diru-laguntzak itzultzeko prozedurari ekiten zitzaion.

Horrenbestez, 31 federaziok jarritako gorako errekurtsoak ezesten dira, eta ordaindutako eta justifikatu gabeko diru-laguntzak itzultzeko prozedura hasten da.

Bestalde, ondorengo kiroletako federazioek aurkeztutako gorako errekurtsoak partzialki baiesten dira: atletismoa, saskibaloia, eskubaloia, hipika, igeriketa, euskal pilota eta taekwondoa, hau da, itzuli beharreko zenbatekoetatik 2014ko otsailaren 28tik aurrera egindako ordainketei dagozkienak deskontatzea.

Foru-agindu honen arabera, erreklamatutako zenbatekoa 140.155,44 euro da, hots, NKGIko zuzendari kudeatzailearen uztailaren 31ko 550/2015 Ebazpenean baino 54.305,56 euro gutxiago.