Gaur egun, maristen programen artean azpimarratzekoak dira etengabe hornikuntza-eteteak jasaten dituzten auzoetan bizi direnentzako andelak egunero garbitutako urez bete eta banatzea, 800 familia baino gehiagori premia biziko elikagaiez betetako otarrak ematea; 550 laguni egunero janari beroa banatzea; eta bularreko haurrentzako esnea eta 10 urtetik beherakoentzako esne-hautsa banatzea. Gainera, ihes egindako pertsonei ostatu hartzen laguntzen diete; jaurtigai, mortero edo balek zauritutako pertsonei osasun-laguntza ematen diete; eta adingabeentzako hezkuntza-jarduerak antolatzen dituzte.

Siriako gerrak, eta zehazki Aleporen setioak eta bonbardaketak, milioi bat pertsona baino gehiago Turkia, Libano, Jordania eta Iraken instalatutako kanpamentuetan errefuxiatuta egotea eragin du. Horien erdiak adingabeak dira. Era berean, kalkulatzen da 350.000 lagun hil direla eta 9 milioi herrialdearen barnean leku batetik bestera dabiltzala.

Elkartasunaren Nazioarteko "Nafarroa" Sarirako hautagaitza SED (Elkartasuna, Hezkuntza eta Garapena) erakundeak aurkeztu du.

Elkartasunaren Nazioarteko "Nafarroa" Saria

Gorago adierazi denez, sari honen bidez Nafarroako Gobernuak eta Laboral Kutxak aintzatetsi nahi dute nazioarteko kooperazioaren edozein esparrutan beren ibilbideagatik nabarmentzen diren erakunde, GKE edo pertsona fisikoen lana, bereziki Nazio Batuen agendak 2030era arte markatzen dituen Garapen Jasangarriaren Helburuak lortzeko egiten dutena, hau da: pobrezia amaitzea, desberdintasunaren eta injustiziaren kontra borrokatzea, eta klima-aldaketari aurre egitea.

Era berean, Nafarroako herritarrak kontzientziatu eta sentsibilizatu nahi dituzte pobretutako herrialde eta herrietan sektore kaltetuenen alde egindako borondatezko lan solidarioak duen garrantziaz.

Nafarroako Gobernuaren eta Laboral Kutxaren artean finantzatzen dituzte saria kudeatzeko gastuak eta sariaren diru-kopurua, 15.000 eurokoa.

Aurtengo edizioan 13 hautagai aurkeztu dira, eta horietatik sei finalista aukeratu dira: Proactiva Open Arms, Espainiakoa; Fundación Promoción Social de la Cultura, Espainiakoa; Comisión Española de Ayuda al Refugiado (CEAR), Espainiakoa; Sabes. Asociación Saneamiento Básico, Educación Sanitaria y Energías Alternativas, El Salvadorekoa; Asociación Marroquí para la Integración de los Inmigrantes, Espainiakoa eta Marokokoa; eta Siriako Anaia Maristak.

Aurreko urteetan sari hau jaso dute Juan Ciudad Fundazioak eta Paciencia Melgar serorak (2014); Martha Pelloni moja argeninarrak (2013), Mama Tunza keniarrak (2012), Manuel Elkin Patarroyo zientzialariak (2011), Creative Handicrafts GKEak(2010), Aguarico-ko Bikariotza Apotolikoak (2009), Mama Samateh Saidy-k eta Wassu Gambia Kafo GKEak (2008), San Joan Jainkoarenaren Anaiek (2007), "Fe y Alegría" mugimenduak (2006), UNASO erakundeak (2005), Errefuxiatuentzako Jesuiten Zerbitzuak (2004), Karitateko Misio Ahizpek (2003) eta Muhhamad Yunnus (2002).

Epaimahai-burua Miguel Induráin txirrindulari-ohi profesionala izan da eta honako hauek osatu dute: Eskubide Sozialetako lehendakariorde Miguel Laparra; Laboral Kutxako lurralde-zuzendari Javier Cortajarena; Nafarroako Unibertsitate Publikoko irakasle titular Paloma Bescansa; AMEDNAko lehendari Mª Victoria Vidaurre; Nazio Batuen Garapen Jasangarriaren Helburuen Kanpainaren ordezkari Xavier Longan; eta Loyola Andalucía Unibertsitateko irakasle titular María Luz Ortega.