Nafarroako Lehendakari Uxue Barkosek inauguratu du gaur goizean AEDIPEren (Pertsonen Zuzendaritza eta Garapenaren Espainiako Elkartea) "Lanaren etorkizuna" izeneko kongresua, eta bertan adierazi du eskualde baten hazkunde ekonomikoa ziurtatzeko giltzarrietako bat giza kapitala dela. "Horregatik hain zuzen ere –esan du–, kongresu hau benetan interesgarria da, gure gizarteen etorkizunerako hain garrantzitsuak diren gai horiek jorratuko direlako. Gogoetak, ezagutzak eta esperientziak partekatzeko foro ezin hobea da, ideiak sortu eta proposamenak egiteaz gain".

Bertaratutako guztiei ongietorria eman ondoren, Lehendakariak egiaztatu du ekonomia globalizatzeko prozesuek eta garapen teknologikoak aldaketa sakonak sortzen ari direla, eta jorratu beharreko erronkei egin die erreferentzia, haien artean: teknologia berriak, globalizazioa, langileen profil berria, edo mugikortasuna. Horrek guztiak dakar, enpresa, langile eta administrazioek egokitzeko beharra izatea. Alde horretatik, enpresak bertako langileei lan-esparru erakargarria eta motibatzailea eskaintzeko gai izan behar du, eta gero eta enpresa lehiakorragoak lortzeko beharra azpimarratu du, merkatu globaletan lehiatzeko gai direnak; merkatu horietan, eredu berri bati begira ongi prestatutako langileak beharko dituzte, eta egoera horrek langileek kalifikazio nahiz prestakuntza handiagoa izateko beharra areagotuko du.

Gobernuak bete beharreko zereginari dagokionez, Barkos Lehendakariak esan du lurraldeko etorkizunerako ikuspegi bat eskaini behar duela, "eragile sozioekonomikoekin partekatutako ikuspegia, estrategia bat barnean hartuko eta bideratuko duena".

Alde horretatik, jakinarazi du Nafarroan espezializazio adimentsuaren eguneratzearen gainean lan egiten ari direla, eta estrategia horren jatorria lurraldeko gaitasunen azterketan dagoela. "Hortik abiatuz, bere lehiakortasun-abantailak zehaztu dira lehentasunezko sektore eta esparruak finkatzeko epe ertain eta luzerako enpresaren berrikuntza eta garapenari begira. Hori guztia lau ardatzekin adostuta: sektore publikoa, sektore produktiboa, ezagutzaren sektorea eta gizarte zibila".

Uxue Barkosek erantsi duenez, "eredu baten aldeko apustu sendo bat da, eta handik sortuko dira garapen ekonomikoko politika eta jarduera publikoak".