Nafarroako Gobernuak gaurko bileran Industria, Energia eta Turismo Ministerioaren aurka administrazioarekiko auzi-errekurtso bat jartzeko erabakia hartu du, Foru Administrazioari alde interesatuaren izaera ez emategatik EITB eta Itelazpi SA enpresaren aurka jarraitzen diren zehapen-espedienteetan.

Maiatzaren 20an, Gobernuak ministerioari EITBren aurkako espedientean pertsonatzeko eskaera egitea erabaki zuen, une horretan emandako emisioak eteteko kautelazko neurrien altxatzea babesteko asmoz, eta haien jarraipena modu iragankorrean bermatzeko. Horretarako, Gobernuak 2013an Nafarroako Parlamentuak onartutako mozioaren mandatua aipatzen zuen; bertan, Foru Gobernuari eskatzen zion ETB LTD bitartez hartzeko aukera erraztu zezala.

Eskaera hori Industria Ministerioko Telekomunikazioen eta Informazioaren Gizarterako Estatuko Idazkaritzak maiatzaren 27an ukatu zuen. Erabaki horren ondoren, Nafarroako Gobernuak uztailaren 29an Idazkaritza horren aurrean aurretiazko errekerimendu bat aurkeztu zuen ukapen hori baliogabetu zezan.

Legeak ezarritako hilabeteko epea igaro ondoren Idazkaritzaren aldetik erantzunik ez dela jaso ikusita, Gobernuak administrazioarekiko auzi-errekurtso bat jartzea erabaki du orain EITBren aurkako espedienteetan pertsonazioa lortze aldera.