2017rako Nafarroako Aurrekontu Orokorren aurreproiektuari dagokionez, Miguel Laparrak adierazi du "eskubide sozialak indartzeaz gain, Osasunean eta Hezkuntzan izandako hazkundea aipatu behar dela, eta horrek benetako kohesio soziala hobetzea ekarriko duela". "Halaber, –jarraitu du lehendakariordeak– garapen ekonomiko eta toki-garapeneko arloan egindako ahaleginak, zerga-erreforma ematen ari den emaitzekin batera, hazkunde ekonomikoaren mailei eusteko funtsezkoak dira, epe ertainean ongizate sozialaren sistema guztia iraunkor bihurtuko dutenak".

Zehazki, Nafar Lansarea datorren urtean % 14,43 haziko da (53,2 milioi). 4 milioi euroko partida berri bat sartuko dela aipatu behar da bermatutako errenta-hartzaileak kontratatzeko.

Aurtengorako hasierako aurrekontuari dagokionez, nabarmendu behar dira: enpresek gazteak kontratatzeko laguntzak % 100 handitu direla; % 37,8 enpleguko eskola-tailerrak eta berariazko programak; % 33,3 gaitasunen egiaztapenak; % 32,1 toki-erakundeetako kontratazioetarako laguntzak; % 30,3 zentro propioetako prestakuntza; % 20,4 langabeen prestakuntza; eta % 17,3 gizarteratzeko zentroetarako partida. Bestalde, eragile sozialekin egindako hitzarmenak % 85,2 jaitsiko dira.

Pertsonen Autonomiarako eta Garapenerako Nafarroako Agentziarako jasotako aurrekontuari dagokionez, zerbitzu pertsonalen arretarako laguntzak handitu egin direla aipatu behar da (845.000 euro), mendeko pertsonak beraien etxeetan artatuko dituzten zaintzaile profesionalak kontratatzeko prestazio ekonomiko berri bat arautzeko asmoz. Gainera, bateragarriak egingo dira familia-inguruneko laguntza ekonomikoa eta mendekotasuna duten adingabeentzako arreta goiztiarreko zerbitzua.

Bestalde, adinekoentzako egoitzetako itunpeko plaza-kopurua igoko da (60), eta baita eguneko zentroetakoa ere (31). Jarduera horiek aurrekontua handitzea ekarriko dute (1,77 milioi).

Desgaitasun-zentroak kudeatzeko 2 milioi gehiago izango dira ere, hitzarmen kolektiboa betetzen dela ziurtatzeko eta Tuterako eguneko arreta-plazak areagotzeko.

Gaixotasun mentaleko zentroak kudeatzeko aurrekontua ere handitu egingo da (650.000 euro) tarteko baliabide berriak sortzeko (babespeko etxebizitzak), eta kontratu berrietan desgaitasun-sektoreko hitzarmen kolektiboa betetzen dela jasoko da.

Desgaitasun-arloko eremuko erakundeei emandako diru-laguntzetan 174.000 euro gehiago izango dira beste helburu batzuen artean autonomia, gizarteratzea, familientzako babesa sustatzen dituzten programak finantzatzeko. Gainera, 200.000 euro gehiago erabiliko dira okupazio-zentroen funtzionamendua sustatzeko; azken horiek desgaituen autonomia, prestakuntza eta laneratzea bultzatzen lan egiten dute.

Gainera, 1,2 milioi euro bideratuko dira inbertsioak egiteko, desgaitasunaren arloan baliabide berriak sortzeko direnak bereziki. Haietako bat adimen-urritasuneko pertsonentzako eguneko zentro berri bat izango da, San Joseko zentro zaharrean dagoena; hari esker, gaur egun Las Hayas eta Valle del Roncal desgaitasunari arreta integrala emateko zentroen eguneko arretako baliabideetara jotzen duten pertsonei arreta ematen zaie. Horrenbestez, egoitza-plazetarako espazioa liberatuko da, haien erabilera berreskuratu ahalko da, eta behar berriei erantzun ahalko zaie. Gainera, Valle del Roncal desgaitasunari arreta integrala emateko zentroko egokitzapen-obrekin jarraitu nahi da.

2017an, 400.000 euroko inbertsioarekin, lizitaziora aterako dira, lehiaketa publikoan: oinarrizko egoitza-harrerako 64 plaza (dagoeneko badaude), egoitza-harrera espezializatuan 5 plaza gehiago eta adingabeen bizitza autonomorako prestakuntzako hamar plaza.

Gainera, 200.000 euro bideratuko dira behar edo egoera berezian dauden adingabeen familia-harrera ahalbidetzeko programa pilotu baterako, harrera-familiaren aldetik arreta espezializatua eskatzen duena. Gainera, egokitasunaren balorazio-programa berri bat abian jarriko da ere harrera eta adopzioko familientzat (modalitate guztietan). 45.000 euroko inbertsioa ekarriko du.

Bestalde, 460.431 euro inbertituko dira Iruñerriko, Ipar-ekialdeko zonaldeko eta Ipar-mendebaldeko zonaldeko Haur eta Nerabeei Arreta emateko Ekipo berriak sortzeko. Gainera, 621.000 euroraino handituko da, % 50, Estellerriko eta Tuterako ekipoak kudeatzeko inbertsioa.

Datorren urtean, Eskubide Sozialetako Departamentuak alokairu sozialerako 234 babestutako etxebizitza publiko eraikitzea sustatuko da, haietatik 48 gazteentzat, eta beste 48 babespeko apartamentuetarako. Gainera, sustatzaile pribatuek beste 50 etxebizitza alokairu sozialerako eraiki ditzan nahi da. Alor horretan, Nafarroako Gobernuak babestutako 4.000 etxebizitzaren errentamendua 12,7 milioirekin diruz laguntzea aurreikusten da, bai eta 200 higiezin gehiago sartzea ere Nasuvinsak kudeatzen duen alokairuko poltsan.

400 babes ofizialeko etxebizitza eraikitzea ere sustatu nahi da, haietatik 300 diru-sarrera txikiko familientzat izango dira, eta tasatutako prezioa duten 250 etxebizitzatatik, erdia baliabide gutxieneko pertsonentzat.

Datorren urterako beste helburuetako bat 6.500 bat etxebizitzaren birgaitzea sustatzea da. Izan ere, era honetako jardueretarako diru-laguntza eta subsidioetarako zenbatekoa 25,76 miloiraino handituko da, 2016ko aurrekontuko hasierako kreditu baino % 0,82 gehiago, eta gaurko finkatutako gastua baino % 21,7 gehiago.

Azkenik, 200 espediente kudeatuko direla kalkulatzen da higiezinen bitartekotzan, honako xede honekin: etxegabetzeak saihestea, 2.000 higiezinen bizigarritasun-baldintzak kontrolatzea eta etxebizitza-arloko informazio-sistemak modernizatzea.,

Bermatutako errentaren partida (orain arte gizarteratzeko errenta izenekoa) 87,9euroraino handituko da, hau da, aurtengorako aurreikusitako hasierako kreditua baino % 54,3 gehiago, eta gaur egun finkatutako aurrekontua baino % 9,5 gehiago.

Gainera, Nafarroako Gobernuak kolektibo ahulenen laneratzea errazteko egindako apustuari eusten zaio; hala, Babestutako Enplegu Sozialari 6 milioiko partida emango zaio.