Nafarroako Gobernuak gaurko bileran erabaki bat hartu du eta, haren arabera, Nafarroako Errepide Sareko Foru Komunitatean sartzen dela adierazteko seinaleak elebidunak izango dira, hau da, gaztelaniaz eta euskaraz jarriko dira, Nafarroako hizkuntz propioak baitira. 2006an emandako aurreko agindu bat aldatuko da, horrenbestez; agindu horrekin, errotulazio hori ezberdina izango zela ezartzen zen, elebiduna edo gaztelaniaz bakarrik, kartela zegoen tokiaren arabera: zonalde euskalduna, mistoa edo euskalduna ez den zonaldea.

Gobernuak uste du 2006ko agindu hori ez datorrela bat Euskararen Foru Legearekin; azken horren 8.3 artikuluan agintzen denez, izendapen ofizialak legezkoak dira ondorio guztietarako Nafarroako lurraldearen barnean, eta errotulazioak haiekin bat egin behar du.

Gaur hartutako erabakiak gaur egun Euskarabidea prestatzen ari den Foru Dekretuaren bi proiekturi aurrea hartzen die, honako helburu hau izanik: alde batetik, Nafarroako hizkuntzen erabilera arautzea, besteak beste Foru Administrazioak egingo duen bide-seinaleei dagokienez, eta bestetik, hiriguneetako izendapen ofizialen erabilera arautzea.

Gaur egun Nafarroako Foru Komunitatean sartzen dela adierazteko era horretako 67 kartel daude. Haietatik 17, zonalde euskaldunean, denak elebidunak; 5 zonalde mistoan, 1 gaztelaniaz eta 4 gaztelaniaz-euskaraz; eta 45 euskalduna ez den zonaldean, 44 gaztelaniaz eta 1 gaztelaniaz-euskaraz; beraz, guztira 45 kartel aldatu beharko dira.