Osasun Departamentuak, lehen aldiz, 2016. urtean espektro autistaren nahasmenduak dituzten 18 urtetik beherako pertsonen tratamenduak sortutako kostuak diruz lagunduko ditu; horretarako, 80.000 euro bideratu dira. Nafarroan espektro autistaren nahasmendua duten 250 bat adingabe daude.

Deialdia atzo, astelehena, argitaratu zen Nafarroako Aldizkari Ofizialean (NAO), eta laguntzak eskuratzeko epea abenduaren 5ean amaituko da. Baldintzei dagokienez, beharrezkoa da espektro autistaren nahasmenduaren diagnostiko bat izatea (edo hura baieztatzeko prozesuan izatea), Nafarroan bizitzea, eta tratamenduaren egokitasuna beharrezko kualifikazioa duen profesional batek agindu izana.

Tratamendua homologatuta izango da, eta honako hauetako profesionalek emango dute: psikologia, maisutza, pedagogia, fisioterapia, logopedia, terapia okupazionala, erizaintza edo gizarte-lana beharrezko prestakuntzarekin. Laguntzek gehieneko tarifa batzuk finkatzen dituzte tratamenduko modalitateetarako: psikologia-ordua, 40 €; fisioterapiakoa, 25 €, logopediakoa, 27 €, psikomotrizitatekoa, 25 €, terapia okupazionalekoa, 20 €, taldekako terapiako saioa, 14 € eta estimulazio-saioa, 25 €. Eskatutako zenbatekoen batura dagoen aurrekontua baino handiagoa balitz, hainbanatu egingo da, eta hala, eskatzaile bakoitzak egindako gastuaren gainean ehuneko bera jasoko du. Laguntza horiei lotutako informazio guztia www.navarra.es webguneko zerbitzuen katalogoari dagokion fitxan ere kontsulta daiteke.

Pertsona onuradun bakoitzak laguntzak jasoko ditu gutxienez tratamenduaren oinarrizko ziklo bat ordaintzeko (1.360 bat euro), dagoen aurrekontua gainditzen bada salbu. Ziklo hori deskontatzen denean, laguntzak tratamenduaren kostuarekin proportzionalak izango dira.

Bideratutako zenbatekoa % 9ko igoera da 2015eko laguntzekin alderatuz (107.000 euro); orduan, 38 adingabek jaso zuten laguntza, 24 mutilek eta 14 neskak, eta zenbateko horrekin familiek egindako gastuaren % 90 inguru estali zen.