Halaber, profesionalen kontzientzia-eragozpena arautzen da, eragozpena agertzen duten HBE motak mugatu ahalko dituztenak, bai eta dagokion erregistroan inskribatzea ere; hala, antolaketako neurri zehatzak hartu ahalko dira.

Bestalde, ezarpenaren aurreko diagnostiko genetikoa Nafarroako Ospitalegunean egitea onartzen da, gaur egun Nafarroan itunpeko zentro batean egiten dena. Haren barnean sartzen dira, besteak beste, gameto edo preenbrioien kriokontserbazioko prestazioak bere diferitutako erabilerarako, eta semen-garbiketarako teknikak gaixotasun biriko kronikoen kutsadura saihesteko. Bi urteko epea aurreikusten da Nafarroako Ospitaleguneak prestazio hori bertako baliabideekin emateko beharrezko teknikak abian jar ditzan.

HBE eta ezarpenaren aurreko diagnostiko genetikoa bertako baliabideekin egiteak urtean 175.00 euro aurreztea ekarriko du. Gaur egun, bi prestazioetarako kontzertuetako gastua 600.000 euro baino gehiago da. Abian jartzeko, ekipo berrietan 400.000 euroko inbertsioa egitea aurreikusten da hurrengo bi urteetan, eta plantillan 15 profesional gehiago egotea.

Guztira, dekretuaren eragin ekonomiko garbia urtean 460.000 euro izatea espero da.

Testu berriak laguntza bidezko ugalketa bermatzen du ere sexu bereko bikotekidea duten emakumeen kasuan, eta intseminazio artifizialeko teknikak gizonezko bikotekidea ez duten emakumeen kasuan agindu terapeutikorik egiaztatzeko beharrik izan gabe. Benetan aplikatzeko, Lurralde arteko Kontseiluan berariazko izapidetze bat behar da.

Halaber, transexualitateari arreta integrala eskaintzen dio, legeak agindutako prestazioen benetako aplikazioa eta betearazpena bermatuz, hau da, ez diskriminatzea genero-identitateagatik edo transexualak aitortzeko arrazoiengatik, terapia hormonalak, kirurgiako zenbait teknika berresleipen sexualerako, bai eta arreta psikologikoa, psikoterapeutikoa eta sexologikoa ere barne

Araudiaren testuan adierazitako laguntza-eredu berriak, halaber, zerbitzuak eskainiko dituzten zentroak berriz antolatuko ditu. Hala, egungo Emakumeentzako Arreta Zentroak Sexu eta Ugalketa Osasuneko Zentroak izango dira orain, eta bi sexuetarako irekita izango dira, arreta integrala, diziplina anitzekoa eskainiz, sexu-osasunaren errealitaterako egokiagoa dena, hezkuntza eta laguntzako zerbitzuak zabalduz, haurdunaldia eteten duten teknika farmakologikoak barne.

Gainera, prestazio tokoginekologiko ohikoak eskaintzen jarraituko dute honako hauei lotuta: haurdunaldiaren arreta, erditzea eta puerperioa, bularreko minbiziaren detekzio goiztiarra eta ginekologikoa, familia-plangintza, antzutasunaren diagnostikoa eta hasierako tratamendua eta jaio aurreko diagnostikoa.

Bestalde, sexu eta ugalketako arreta eta orientazioko Gazte Programa sustatuko da; haren barnean sartuko dira: "Gazteentzako Osasuneko Web Espazioa", "Gazteentzako Osasuneko Espazio Fisikoak", bai eta esku hartze komunitarioko beharrezko jarduerak nahiz taldekako hezkuntza-jarduerak ere.

Sexu eta Ugalketa Osasunari buruzko Dekretua herritarren partaidetzarako zabaldu da bi alditan jendaurrean informazioa emateko eta jendaurrean jartzeko epeetan. Hala, erantzun zabala eskuratu da profesionalen, elkarteen eta partikularren ekarpenei dagokienez. 346 ekarpen aurkeztu dira, eta haietatik % 66 guztiz edo zati batean onartu dira.

Gainera, Foru Dekretu honek hezkuntza-arloan hezkuntza afektibo-sexuala ezartzea jasotzen duenez, Nafarroako Eskola Kontseiluko txostenaren mende geratu da, eta txosten hori aldekoa izan zen 2016ko maiatzaren 30ean egindako bileran hartutako erabakiz. Halaber, Nafarroako Kontseiluak Foru Dekretu hau onartu egin zuen, Nafarroako Gobernuak azaroaren 16an behin betiko onartu aurretik eman beharreko azken urrats moduan.