Azaldu dutenez, "beren beharrak identifikatzeko eta adierazteko, partaidetzazko estrategiak prestatzeko eta behar horiei aurre egiteko taldekako ekintzak egiteko gai diren pertsonek eta taldeek osatutako gizartea, osasunaren erabakitzaileen kontrol handiagoko gizartea da eta, beraz, komunitate osasuntsuagoa ".

Laguntzen deialdia ostiral honetan, hilak 30, argitaratuko da Nafarroako Aldizkari Ofizialean, eta haiek eskuratzeko epea 2017ko urtarrilaren 30ean amaituko da. Estreinakoz, eta ahalik eta gardentasun handiena lortzeko asmoz, deialdiko oinarrien barnean diru-laguntza lerro bakoitza baloratzeko azpirizpideak sartzen dira, bai eta diruz lagundu daitezkeen gehieneko moduluak ere.

Laguntzak zortzi arlotako programak finantzatzeko dira, aurreko urteetan baino bat gehiago, bertan sartzen baitira, berrikuntza gisa, sustapen eta hezkuntza afektibo-sexual komunitariorako laguntzak (108.000 euro).

Zehazki, jarduera-lerroak honako hauek dira:

1. Pazienteen eta senideen elkarteetarako diru-laguntzak (418.000 euro): osasun-arazoengatik kaltetutako pertsonentzako edo haien senideentzako proiektuak (GIB-HIESa kanpo), Paziente Kronikoak eta Patologia Anitzekoak Artatzeko Nafarroako Estrategian jasotako prestakuntzako edota autolaguntzako programetan arreta berezia jarriz.

2. Adikzioak prebenitzeko udal-planetarako diru-laguntzak (490.000 euro): droga-kontsumotik sortutako ondorioen prebentzio komunitariorako programak, udalerriek eta mankomunitateek eginak.

3. Erakundeetarako diru-laguntzak adikzioak prebenitzeko programetarako oinarria eremu komunitarioan izanik edo izan gabe (235.000 euro): droga-kontsumotik sortutako ondorioen prebentzio komunitariorako programak, gobernuz kanpoko erakundeek eta antzekoek eginak.

4. Programa komunitarioetarako diru-laguntzak GIB-HIESaren infekzioari lotuta (127.275 euro), elkarteek edo fundazioek egindako prebentzioko ekintzei arreta berezia eskainiz.

5. Prebentzioko eta osasuna sustatzeko programa komunitarioetarako diru-laguntzak (180.000 euro), elkarteek, fundazioek edo erakundeek eginak beraien zonaldeko zerbitzuen nahiz baliabideen laguntzarekin, tabakoari lotutakoak barne, eta drogazaletasunen eta HIESaren prebentziokoak kanpoan utzita.

6. Ijitoen komunitateari lotuta, osasuna sustatzeko programetarako (bitartekaritza eta hezkuntza) diru-laguntzak (200.000 euro).

7. Elkarteek edo fundazioek Nafarroako enpresetan lan-arriskuen prebentzioko jarduera garatzeko programetarako diru-laguntzak (100.000 euro).

8. Sexu-osasuna eta ugalketakoa sustatzeko programa komunitarioetarako diru-laguntzak, elkarteek, fundazioek edo toki.erakundeek eginak (108.000 euro).

Laguntzen deialdi honi (1,86 milioi euro) Hogar Zoe-ri lotutako 120.000 euroko partida bat gehitzen zaio, eta hurrengo urtetik aurrera Eskubide Sozialetako Departamentuak kudeatuko du.

Bestalde, Dominguez kontseilariak iragarri duenez, urtarriletik aurrera diru-laguntza izendunak emango zaizkie Adonari, Minbiziaren aurkako Espainiako Elkarteari, Peto metodoarekin tratatzen ari diren garun-paralisidun haurrentzako laguntzak emango dira eta autismoa duten haurrentzako laguntzak, 674.640 euro, guztira.

Aipatu den moduan, 2016an era honetako ekintzetarako eta ekimenetarako 1.776.709 euroko laguntzak bideratu dira, eta 337 erakunde, fundazio eta irabazi-asmorik gabeko elkartek eskuratu dituzte.

Jarduera-arloen arabera, zenbatekoen xehatzea honako hau izan da: 39 osasun-programetan; 46 drogazaletasunaren aurkako udal-planetan; 17 prebentzio komunitarioko programetan; 201 prebentzioko eta osasun sustatzeko programetan; 9 gutxiengo etnikoen programetan; 17 lan-arriskuak prebenitzeko proiektuetan; eta 8 GIB-HIESari lotutako programetan.