Urtean zehar Nafarroan gertatutako hiri- eta industria-suteen %30 baino gehiago etxebizitzen barruan gertatzen dira. Horietako bat pasa den urrian izan zen Iruñeko Zapatari kalean, eta 77 urteko emakume bat hil zen.

Babes Zibilaren arabera, etxebizitzetan "sutea piztu dezaketen elementu asko daude, eta herritarrak ez dira horretaz ohartzen". Gainera, gogoratu du hildako gehien izaten diren suteak lotan gauden bitartean gertatzen direla; beraz, suteak detektatzeko gailuak jartzea gomendatzen du.

Aholku horien artean (euskaraz ere zabaldu dira), halaber, adierazi du instalazio elektrikoa gehiegi ez kargatzea biderkagailuekin (lapurrak), entxufe eta konexio normalizatuak erabiltzea eta erabili ondoren aparatu elektrikoei entxufea ateratzea, instalazio elektriko ahulak edo horien erabilera okerrak sua pizteko arrisku larria eragiten baitu.

Era berean, komeni da sukaldeko ke-kanpaia, suak eta ekonomikak tarteka garbitzea, hodietan pilatutako koipeak eta zikinkeriak sutea eragin baitezakete. Ez da komeni eltzea, kazola edo zartagina sutan ahaztuta uztea, eta inoiz ez da urik bota behar su hartutako zartaginaren edo frijigailuaren gainean, trapu heze edo estalki batekin estali baizik.