Nafarroako Gobernuak jakinarazi duenez, Euskararen Gaitasun Agiria (EGA) lortzeko 2017ko 1. deialdian parte hartzeko matrikulazio-epea, urtarrilaren 9tik 20ra izango da, biak barne. Azterketak egiteko interesa duten pertsonak Hezkuntza Departamentuko Informazioko Negoziatuan matrikulatu daitezke (Santo Domingo kalea, 8. Iruña), 08:30etik 14:30 bitarteko ordutegian.

Hautagai bakoitzak 26 euro ordaindu beharko du azterketa-eskubideen kontzeptuan (13 euro lehen mailako familia ugariaren kasuan). Matrikula doan izango dute bigarren mailako familia ugariaren kideek.

Azterketa hiru probek osatzen dute: atarikoa, idatzia eta ahozkoa.

Atarikoan 80 galderek osatutako test bat erantzun beharko dute, eta harekin hizkuntz baliabideak, ahozko ulermena eta irakurmena ebaluatuko dira.

Bestalde, idatzizko azterketa bi ariketek osatuko dute: 180 hitzeko idatzi batek eta 250eko beste batek, gutxienez,.

Azkenik, ahozko probak ere bi atal izango ditu: emandako testu bati buruz bost minutuz hitz egin beharko da eta, horren ondoren, hamar minutuz eztabaidan ariko dira.

Titulua eskuratzeko hiru probak gainditu beharko dira.