Nafarroako Gobernuak deialdia egin du, ariketa teoriko bitartez, E mailako aldi baterako kontrataziorako zerrendak eratzeko; horren helburua da Foru Administrazioko langileen beharrei erantzutea, Osasun Departamentuan izan ezik.

Hautapen-prozesu horretan parte hartu nahi dutenek otsailaren 15a baino lehen aurkeztu beharko dute parte hartzeko eskabidea Nafarroako Gobernuaren edozein erregistrotan, www.navarra.es atarian edo 39/2015 Legean aurreikusitako gainerako lekuetan, postetxeetan esaterako.

Besteak beste, honako eskakizunak bete behar dituzte izangaiek: eskola-ziurtagiria izatea, Bigarren Hezkuntzako graduatu titulua, eskola-graduatuko titulua, oinarrizko lanbide heziketakoa, lehen mailako lanbide heziketakoa edo baliokideren bat izatea.

Izena ematerakoan, lan egin nahiko luketen Nafarroako mugape geografikoak eta lanaldi partzialeko kontratuak onartzeko duten prestasuna ere aukeratu beharko dute izangaiek.

Euskara eskatzen duten kontratazioetan sartu nahi dutenek Hizkuntzetarako Europako Erreferentzia Esparru Bateratuaren C1 mailari dagokion tituluaren fotokopia aurkeztu beharko du, edo izangaiak hizkuntza-maila egokia duela egiaztatuko duen froga bat egin beharko du.

Onartutakoen zerrenda, froga teorikoa eta gaiak

Eskabideak aurkezteko epea amaitu ondoren, Funtzio Publikoaren Zuzendaritza Nagusiak deialdian onartu eta baztertu diren pertsonen behin-behineko zerrendak argitaratuko ditu Nafarroako Gobernuaren iragarki-taulan (Iruñeko Carlos III.aren Hiribidea) eta www.navarra.es webgunean.

Hautapen-prozesuan froga teoriko bat egingo da; hainbat erantzun-aukera eta erantzun zuzen bakarra duten 80 galderako galdetegiari erantzun beharko diote izangaiek idatziz.

Elektrizitateari, igeltserotzari, margolaritzari, egurrezko eta metalezko arotz-lanei, lorezaintzari, iturgintzari, berogailuei, saneamenduari eta oinarrizko mekanikari buruzkoak izango dira galderak.