Adierazi dugun bezala, Herri Lanen Zuzendaritza Nagusiak elurra kentzeko 100 bat makina jarriko ditu lanean, honako errepideetan: Nafarroako Autobidean (AP-15); Sakanako Autobian (A-10); A-12 Autobian; Leitzarango Autobian (A-15); Iparraldeko Autobian (A-1); Pirinioetako Autobian (A-21); Iruñeko ingurabidean (PA-30); Iruña eta Behobia batzen dituen errepidean (N-121-A); Iruña eta Frantzia Baztandik batzen dituen errepidean (N-121-B), eta Iruña eta Tutera arteko errepidean (N-121).

Lantalde horiek beste errepide batzuetan ere jardungo dute lanean; honako hauetan, besteak beste: Aibar, Belagua, Belate, Carrascal, Erro, Etxauri, Ezkurra, Ibañeta, Las Coronas, Latza, Lerga, Lizarraga, Loiti, Markalain, Meano, Mezkiritz, Otxondo, Uxue eta Urbasako mendateetan, bai eta Ameskoa, Goñi, Ultzama eta Orbaibarreko piriniar haranetan ere.

Nafarroako Gobernuak herritarrei gomendatzen die aurrera edo atzera ditzala gaurko, asteartea, azkeneko orduetarako eta biharko, asteazkena, lehenengo orduetarako iparralderako aurreikusita zituen joan-etorriak. Ezinbesteko joan-etorriak baldin badira, neguan gidatzeko egiten diren ohiko gomendioak kontuan hartu behar dira: abiatu aurretik errepideen egoeraren berri izatea, bai eta hurrengo orduetarako eguraldi-iragarpenaren berri ere.

Hobe da egunez eta errepide nagusietan gidatzea, batez ere autobide eta autobietan. Halaber, garrantzitsua da pneumatikoen, balazten, bateriaren, izotz-kontrakoaren, argien, hoztailearen eta berogailuaren egoera aztertzea ere. Erregai-depositua beteta ibiltzea komeni da, eta 100 kilometro bakoitzeko erregaia botatzea, kateak edo neguko pneumatikoak eramatea, telefono mugikorra eta kargagailua, mantak eta arropa berogarriak, jan-edana, eta alkohola eta arraspa haizetakotik.

Nafarroako Gobernuak herritarrei gogorarazten die beharrezkoa dela trafikoko agintarien zein galtzadan izotza egon daitekeela dioten seinaleen jarraibideei jaramon egitea eta errespetatzea. Gainera, gidariei eskatzen die ez ditzatela elurra kentzeko makinak aurreratu, inola ere ez dezatela euren ibilgailua galtzadan gelditu, eta debekatuta dagoela ibilgailuak galtzadan aparkatzea, baita errepide zati bat hartuta aparkatzea ere, horrek zaildu egiten dituelako elurra errepidetik kentzeko lanak (ezinezkoa izaten da elurra kentzeko makinak igarotzea edo elurra bazterbidean ondo metatzea).

Matxuragatik edo bestelako inguruabarrengatik, ibilgailua geratu beharra izanez gero, galtzadatik kanpo uztea komeni da. Ibilgailu barruan doazen lagun guztiak irten beharko dira, eta norbere burua babesteko neurri guztiak hartu beharko dira, beste ibilgailuren batek ez harrapatzeko; hala nola, txaleko islatzaileak janztea eta babes-elementuen (bazter-babesak) edo ibilgailuaren beraren atzean jartzea, zirkulazioaren noranzkoan.

Hiriguneetan elurra egiten badu edo izotz-plakak sortzen badira, Nafarroako Gobernuak herritarrei gomendatzen die, adineko pertsonei batez ere, euren etxeetatik ez irtetea. Kalera irten behar izanez gero, beharrezkoa da oinetako egokiak, gomazkoak, janztea, erorketak saihesteko.