Nafar Lansare Nafarroako Enplegu Zerbitzuak landun pertsonak trebatzeko 223 ikastaro lagunduko ditu diruz 2017. urte amaiera arte, 13 ikastetxetan. Neurri horrek 985.959 euroko kostua dauka, eta 223 ikastarotako % 100ean diruz lagundutako 3.300 plaza inguru finantzatuko da kopuru horrekin; guztira, trebakuntzako 7.000 ordu.

Ikastaro horietatik guztietatik 46 Agoitz, Altsasu, Doneztebe, Lizarra, Tafalla eta Tutera udalerrietako ikastetxetan eskainiko dira. Gainerakoak, berriz, Iruñean eta Iruñeko eskualdean.

Nafarroako lurraldeko pertsona landunei zuzenduta dago, batez ere, deialdia, baina langabeek ere badute parte hartzeko aukera; gehienez ere partaideen % 40 izan daiteke langabea. Nafarroako Gobernuaren Enpleguaren Atarian daude ikusgai ikastaroen zerrenda, datak eta lekuak, Nafarroako Gobernuaren enpleguari buruzko atarian; hor jasotzen da enplegurako, ekintzailetzarako edo enplegurako gaitasun pertsonalerako Nafarroako Enplegu Zerbitzuaren prestakuntza-eskaintza.

Langile guztiek egin ditzakete ikastaroak, baina berariazko hiru lerro daude. Lehenengoak 786.039 euroko aurrekontua dauka, eta sektore arteko prestakuntzari dagokio; jarduera ekonomikoko hainbat sektoreri zuzendutako zeharkako gaitasunak ikastera bideratutako trebakuntza-ekintzez osatuta dago, edo sektore bateko berariazko gaitasunak ikastera bideratutako ekintzez, beste sektore batzuetako langileen birziklapen eta birgaikuntzarako, langileen legezko ordezkaritzaren berezko eginkizunetarako gaikuntzara bideratutako prestakuntza barne.

Bigarren lerroa bereziki zuzenduta dago ekonomia sozialeko bazkide eta langileei, beti ere jarduera ekonomikoa badakarte, eta 99.928 euroko aurrekontua dauka. Azkenik, langile autonomoei zuzendutako beste lerro bat dago, 99.992 euroko aurrekontuarekin.