Gogorarazi behar da Nafarroan arrantzatzeko beharrezkoa dela dagokion denboraldirako indarrean dagoen arrantza-lizentzia izatea. Lizentzia hori agiri pertsonala da, besterenezina eta nahitaezkoa, Foru Komunitatean arrantza egiteko baimena ematen duena.www.navarra.es atarian tramita daiteke. 12 euroko kostua dauka arrantza-lizentzia eskuratzeak; agiri hori gabe arrantza egitea, berriz, zigor daiteke 501 eta 2.000 euro arteko isunaz, lizentzia kentzearekin eta urtebete eta hiru urte arteko denbora-aldi baterako ezgaitzearekin.

Arrantzarekin lotutako gainerako arau-hausterik ohikoenak dira nahitaezko dokumentazioa aldean izan gabe arrantza egitea, eta bi kanaberarekin batera edo bat baino gehiagorekin, izokinaren eta amuarrainaren kasuan.

Ehizagatiko eta mendietako jarduerengatiko espedienteak

Iaz abiarazitako espedienteen % 23 ehizako arau-hausteekin lotutakoak izan ziren. Ohikoenak dira nahitaezko dokumentazioak aldean izan gabe ehizatzea, ehizari buruzko arauak ez betetzea segurtasun-eremuetan, Ehiza Antolamenduko Planean jasotako mugak ez betetzea, zori-egun deritzen egunetan ehizatzea, debekatutako moduak erabiltzea ehizatzeko administrazio-baimenik gabe, eta lizentziaren titular izan gabe ehizatzea, barrutiko baimenik gabe edo horretarako ezgaituta egonda.

Mendietako jarduerekin lotutako espedienteen % 23ari dagokionez, ohikoenak dira baimenik gabe baso-erabilera aldatzea; zuhaitzak moztea, ateratzea, kaltetzea edo jabetzea administrazio-titulurik gabe; edozein erreketa egitea, sua erabiltzea edo mendian sua eragin dezakeen beste edozein jarduera egitea, baimenik gabe edo Administrazioak ezarritako aginduak bete gabe; eta basoko suteak prebenitzeko eta itzaltzeko arloan emandako suaren erabilera arautzen duten xedapenak ez betetzea.

Ingurumen arloko arau-hausteen salatzaileei dagokienez, Basozainen Atalaren, Foruzaingoaren eta SEPRONAren salaketengatik jasotako proposamen kopurua nahiko paretsua da; nabarmen gehitu dira Basozainen salaketengatiko zehapen-espedienteak.

Bestalde, aipatzekoa da Basozainen salaketa gehienak mendiekin eta abelbideekin lotutakoak direla; Foruzaingoaren salaketa gehienak ehizarekin eta arrantzarekin lotutakoak, eta SEPRONArenak arrantzarekin eta mendiekin.

Gaur egungo Ekonomia Zirkularraren eta Uraren Zerbitzuak jasotako proposamenei dagokienez, gehienak egindako ikuskapenen ondoriozkoak dira, eta ia denak dira ikuskatutako enpresen ingurumen-baimen integratuak finkatutako ingurumen-baldintzak ez betetzeagatik egindakoak; horrek Ingurumenaren Babeserako Esku-hartzeari buruzko martxoaren 22ko 5/2004 Foru Legearen urraketa larria dakar.

Aurretiazko jarduketak 94 prozeduratan

Adierazi bezala, iaz amaitutako 407 zehapen-espedienteetatik 313tan zehapen-prozedura abiarazi zen. Gainerakoetan, 94 espedientetan, aurretiazko jarduketak bakarrik egin ziren.

Jarduketa horiek dira informazio-aldi bat irekitzea salatutako gertakariak argitzeko, kasu zehatzaren inguruabarrak ezagutzeko eta zehapen-prozedura abiarazi beharraren gaineko erabakia hartzeko. Egoera horietan, gertakariak argitu ezin badira, errekerimendu bat bidali ohi da, ustez bete ez diren legezko betebehar zehatzak gogoraraziz.

Gainera, aurretiazko jarduketa multzo horren barruan sartzen dira zehapen-prozedura hasi aurretik preskribatu diren arau-hausteengatiko salaketak. Kontuan izan behar da ingurumenarekin lotutako salaketa gehienak arau-hauste arinengatik egiten direla, eta horiek sei hilabete igarotakoan preskribatzen direla.

Ordezko ingurumen prestazioa

Zehapen ekonomikoen kasuetan, horren ordez, zigortutako pertsonak hala eskatuta, ingurumenaren aldeko zerbitzu bat egiteko aukera egoten da. Zerbitzu horren zenbatekoak ezarritako isunaren baliokidea izan behar du gutxienez. Ingurumen-alderdi jakin batzuk hobetzeko edo ingurumenaren aldeko edozein jarduketa izan daiteke.

Zehatutako pertsonak adierazi behar du horretarako bere nahia. Landa Garapeneko, Ingurumeneko eta Toki Administrazioko Departamentuko langileen kontrolpean egiten da beti. Behin egin dela egiaztatzen denean, zehapena indargabetzeko administrazio-tramitea egiten da.