Bere hornitzaileen fakturak arinen ordaintzen dituen erkidegoa izan zen Nafarroa 2016an, 2015eko datuak ere hobetuta. Gainera, Euskal Autonomia Erkidegoarekin batera, legeak ezartzen duen epearen barruan ordaintzen duen bakarra da; ordaintzeko 30 egunetik beherako batez besteko epea, hain zuzen ere, ezartzen du legeak.

Ostiral honetan ezagutarazi dituzten Ogasun eta Funtzio Publikoko Ministerioaren datuek erakusten dute Foru Komunitateko administrazio publikoa osatzen duten organismoek 20,1 eguneko batez besteko ordainketa-epea bete dutela; Estatuko batez besteko ordainketa-epea, berriz, 59,46 egunekoa da, eta 29,46 egunetan gainditzen du berankortasunari buruzko araudian ezarritako gehienezko epea. Zifra horien arabera, Foru Komunitateak zertxobait hobetu ditu 2015eko emaitzak; Estatuan, berriz, luzatu egin da ordaintzeko batez besteko epea, 7 egunetan hain zuzen ere.

Nafarroa da bere hornitzaileei azkarren ordaintzen dien komunitatea, 2014ko irailean administrazio publikoen (Estatua, Autonomia Erkidegoak, toki korporazioak eta Gizarte Segurantza, besteak beste) datuak argitara ematen hasi zirenetik.

Oraingo honetan ere, nabarmentzekoa da emaitza oso onak lortu dituen Nafarroako Osasun Zerbitzuak; Foru Komunitateko Administrazio osoaren eta bere organismo autonomoen fakturazio-bolumenaren erdia hartzen du zerbitzu horrek, eta azkartasun handiz ordaintzen du. Organismo horrek abenduan izan zuen hileko batez besteko ordainketa-epea 19,9 egunekoa izan zen (27,29 egun abenduan ordaindutako eragiketetan, eta 12,04 egunekoa ordaintzeko zain zeuden eragiketetan).

2015ean ere Nafarroa izan zen bere hornitzaileei azkarren ordaindu zien komunitatea (20,37 egun), Espainiako batez bestekoaren egun erdiekin eta, Euskadirekin batera, ordainketak legez ezarritako epearen barruan egin zituena.