Uxue Barkos Nafarroako Lehendakariak berretsi egin du gaur Nafarroako Gobernuak "edozein eratako" terrorismoaren errefusa eta gaitzespenarekiko konpromisoa duela.

Horixe adierazi du gaur eguerdian, Nafarroako Gobernuak deituta, Carlos III.aren Etorbidean, Nafarroako Jauregiaren fatxadaren aurrean egindako kale-agerraldiaren ondoren; bihar, martxoak 11, Terrorismoaren Biktimen Europako Eguna da, Madrilen 2004an gertatu ziren atentatuak gogoratzeko.

Kale-agerraldi horretan egon dira Gobernuko beste kide batzuk ere: Mikel Aranburu Ogasuneko eta Finantza Politikako kontseilaria, Ana Ollo Herritarrekiko eta Erakundeekiko Harremanetako kontseilaria, Jose Luis Mendoza Hezkuntzako kontseilaria, Ana Herrera, Kulturako, Kiroleko eta Gazteriako kontseilaria, Maria Solana bozeramailea, eta Alvaro Baraibar, Bakearen, Bizikidetzaren eta Eskubide Sozialen zuzendari nagusia. Nafarroako beste erakunde batzuetako arduradunak ere egon dira; besteak beste, Parlamentuko lehendakari Ainhoa Aznarez, Pablo Azcona Nafarroako Udalerrien eta Kontzejuen Federazioko lehendakaria, eta parlamentuko eta sindikatuetako ordezkariak.

Agerraldian ETAko biktimarik ez egotearen inguruan galdetu diote kazetariak, eta Lehendakariak azpimarratu du "beti errespetatzen dituela pertsonen iritziak", eta bere atsekabea azaldu du "elkarren arteko aldeek, nahiz eta legitimoak izan, ez gaituztelako gaur hemen denok elkartu, beti denon helburu nagusia izan beharko litzakeen horretan: terrorismoarekiko gaitzespena martxoaren 11ko urteurrenean, Terrorismoaren aurkako Europako Egunean".

Halaber, Barkosek esan du Nafarroako Gobernua "terrorismoaren edozein modu gaitzesten den lekuan" dagoela "gaur, eta halaxe egongo dela beti".

Nafarroako Gobernuak pasa den asteazkenean onartu zuen adierazpen instituzional bat, terrorismoaren aurrean, "bakearen eta bizikidetzaren kultura bat defendatzen jarraitzearen" aldeko apustua egiten duena; izan ere, adierazpen horrek jasotzen duenez, "Giza Eskubideekiko erabateko errespetutik eta gertatutakoaren memoriatik soilik eraiki ahal izango dugu gizarte bidezkoagoa, solidarioagoa, etikoagoa eta demokratikoagoa, pauso sendoz aurrera egingo duena bizikidetzarantza, eta biktimek egia ezagutzeko, justiziarako eta ordaina jasotzeko duten eskubideari erantzuna emango diona".

Horri dagokionez, zera adierazi zuen Gobernuak: