Prozesuak homogeneizatzeko eta zentralizatzeko ildo berean, unitate horrek aurreikusten du apirilean amaituko dituztela garbiketa-gune propioa izateko aukera emango dioten lanak. Era horretan, esterilizazio-ziklo osoa (garbiketa eta desinfekzioa, paketatzea eta esterilizazioa) egin ahal izango da gune berean. Gaur egun, garbiketaren zati hori Ebakuntza-gelen eremuan egiten da Nafarroako B Ospitalegunean, eta handik dagoeneko garbituta iristen da materiala II. Esterilizazio-unitatera.

Gela berriak hiru garbigailu termo-desinfektatzaile izango ditu, 541 litroko edukierarekin; laugarren gailu bat jartzeko aurre-instalazioa eginda, etorkizunean sor daitezkeen beharrei erantzun ahal izateko; unitateko orgak, edukiontziak eta tresna mugikorrak garbitzeko tunela; ultrasoinu bidezko ikuzgailua; sakonera handiko garbiketa-upelak; eta materialak lehortzeko aire konprimatuzko terminalak.

Garbiketa- eta desinfekzio-ekipoetara iristen den ura tratatzeko planta bat ere izango du gelak, eta lan horietarako erabiltzen diren produktu kimikoak dosifikatzeko sistema zentralizatu bat; horrela, eskuzko manipulazioa eta isuriekin eta jarioekin lotutako arriskuak saihesten dira. Gailu horiei esker, prozesuak ahalik eta gehien automatizatuko dira; elektronikoki kontrolatuko dira, ukimen-pantaila bidez. Garbiketa-eremuak diseinu aseptikoa du, tratatzen diren materialak eta zerbitzuan lan egiten duten langileak gurutzatzea eta haien atzeranzko urratsak saihesteko pentsatutakoa, kutsadura gurutzatuak saihesteko.

Aurreikuspenen arabera, apirilean jarriko dute martxan garbiketa-gune berria fase pilotuan, eta udan prest egongo da dagoeneko Nafarroako B Ospitaleguneko kirurgia-bloke berritik iritsiko diren materialak hartzeko. Gaur goizean bisitatu dituzten instalazioak Fernando Dominguez Osasuneko kontseilariak, Antonio Merino Nafarroako Ospitaleguneko zuzendari kudeatzaileak, Maite Soria Osasun-zainketetako zuzendariak, eta Nieves Gurpide Esterilizazioko Erizaintza-unitateko buruak.

226.000 osasun-produktu baino gehiago esterilizatzen da urtean, eta 16.000 kalitate-kontrol egiten da

226.000 osasun-material baino gehiago prozesatu zituen 2016an II. Esterilizazio-unitateak, tresna solteak eta ebakuntza mota ezberdinetara bideratutako tresna-edukiontziak kontuan hartuta. Gainera, egindako tratamenduen 16.000 kalitate-kontrol egin zituen. 79.985 euroko gastua izan zuen.

Barruti horretan esterilizatzen den materialaren erdia (106.498 produktu) ebakuntza-geletako tresnak dira; ondoren, ospitaleratze-plantetako produktuak daude (54.117), kanpo-kontsultetako tresnak (52.639) eta zerbitzu guztiei ematen zaizkien ehun-materialak (13.604).

Ospitale Orokorrean eta Amentzako Ospitalean erabiltzen diren materialak esterilizatzen ditu unitate horrek; Nafarroako B Ospitaleguneko 17 ebakuntza-geletakoak (jarduera programatua duten 5 ebakuntza-gela nagusi, larrialdietako bi, haurrentzako beste bi, ginekologiako hiru, Amentzako areako bi ebakuntza-gela orokor, Obstetriziako larrialdietako bat, aurpegi-masailetako ebakuntza txikietarako bat, eta kirurgia plastikoko ebakuntza txikietarako beste bat); lau erditze-gelatakoak; B Ospitaleguneko kontsultetakoak; Vianako Printzea kontsultategiko kanpo-kontsultetakoak; San Martin Doktorea osasun-zentrokoak; eta emakumeen arretarako Ermitagañako eta Hiri-zabalgunea II zentroetakoak. Jarduera horri Lehen Mailako Arretako saretik datozen materialen esterilizazio-lanak gehitu zaizkio berriki.