Akitania-Euskadi-Nafarroa Euro-eskualdeak laguntzetarako aurtengo lehenengo deialdia egin du; 400.000 euro izango dira guztira, eta gutxienez Akitania Berriko bazkide bat eta EAEko edo Foru Komunitateko beste bat duten aktoreak dituzten eta kulturari, hezkuntzari, gazteriari, kirolari edo eleaniztasunari buruzko proiektuen aurrekontuaren % 50 diruz laguntzeko balioko dute. 

Laguntza horiez gain, "ekonomiari, ikerkuntzari eta berrikuntzari" buruzko proiektuak finantzatzeko diru-laguntzen beste deialdi bat egingo du euro-eskualdeak 2017ko bigarren seihilekoan; 300.000 euroko aurrekontua izango du deialdi horrek.

Deialdi honetako diru-laguntzak euro-eskualdearen 2014-2020 plan estrategikoan sartzen dira; plan horretan, herritarren, eleaniztasunaren eta mugikortasunaren esparruetan lankidetza-proiektuak garatzearen garrantzia nabarmentzen da, bai eta eskualde ezberdinetako aktore pribatu eta publikoen arteko lankidetza sustatu eta dinamizatzearena ere.

Deialdiaren oinarrien arabera, lehentasunezkotzat joko dira kultura-sorkuntzari eta –zabalkundeari buruzko proiektuak, batez ere sortzaile gazteenak badira eta gazteei zuzendutakoak badira; hezkuntzari eta gazteriari buruzkoak, mugikortasuna eta ikastetxeen arteko elkartrukeak sustatzen dituztenak; elkarte-kirolari buruzkoak; eta Euro-eskualdeko lau hizkuntzen erabilera eta ezagutza bultzatzen duen eleaniztasunari buruzkoak.

Inola ere ez dira finantzatuko kirol federatuko lehiaketak, turismoari bakarrik lotutako helburuak dituzten jarduerak eta pertsona bakar baten proiektuak.

Apirilaren 19ra arte (15:00) dago lanak aurkezteko epea; horretarako, galdetegi elektroniko bat bete behar da Euro-eskualdearen laneko hiru hizkuntzetako batean, eta horrekin batera, frantsesez eta euskaraz edo gazteleraz idatzitako proiektuaren fitxa, eta bazkideen konpromisoa eta finantzazio-plana aurkeztu behar dira.