Europako Batzordeko lehendakariorde eta Energiaren Batasunaren arduradun Maros Sefcovic jaunak gaur, ostirala, bisitatu du CENER zentroaren (Energia Berriztagarrien Zentro Nazionala) egoitza Sarrigurenen, eta zentro horrek Zangozan duen Aerosorgailuen Entsegu-Laborategia; xehetasunez ezagutu ahal izan ditu zentroa energia-gaiei buruz garatzen ari den I+G+b-ko proiektuak, bai eta nazioartean entzutea eman dioten entsegu-azpiegiturak ere.

Espainiarako bere bisitaren helburu nagusietako bat, hain zuzen ere, azpiegitura bereziak ezagutzea zen, berriztagarrien sektorean Europan daudenetako batzuk.

Europako Batzordeko lehendakariarekin batera egon dira bisita horretan CENEReko lehendakaria eta Nafarroako Gobernuko Garapen Ekonomikoko lehendakariordea den Manu Ayerdi, Juan Maria Vazquez Ekonomia, Industria eta Lehiakortasun Ministerioko Zientzia eta Berrikuntzako idazkari nagusia eta Pablo Ayesa CENEReko zuzendari nagusia, beste agintari batzuen artean; baita zentroaren Kudeaketa-batzordeko kideak ere. Halaber, europar ordezkaritza osatzen zuten Sefcovic lehendakariordearen kabineteko kideek eta Aranzazu Beristain Europako Batzordeko Espainiako ordezkaritzaren zuzendariak.

Bisitaren lehen zatia CENERen egoitzan egin da, eta prentsaurreko labur bat egin dute han. Agerraldi horretan, EBko lehendakariordeak adierazi du I+G+b "funtsezko oinarria" dela Energiaren Batasuna eraikitzeko. "Harro egon behar dugu CENERek, energia berriztagarriei eta gure hiri adimentsuen garapenari dagokionez, nazioartean eta Europan betetzen duen eginkizunaz", esan du.

Manu Ayerdik gogorarazi du iaz aurkeztu zela Nafarroaren 2030erako Energia Plana, eta plan horretan proposatzen dela 2030. urterako energia berriztagarrietatik etortzea energia-kontsumoaren % 50. Gainera, adierazi du Nafarroako Espezializazio Adimentsuaren Estrategiarako sektore garrantzitsua dela energia berriztagarriena Nafarroan. "Horrek esan nahi du, inbertsiorako lehentasunezko sektorea izateaz gain, etorkizuneko erronkei aurre egiteko eskualdeko ekonomia gehien bultza dezakeen sektoretzat jotzen dela".

Ekonomia, Industria eta Lehiakortasun Ministerioko Juan Maria Vazquezek, bestalde, azaldu du CENER bezalako zientziaren eta teknologiaren arloko azpiegitura handiak funtsezkoak direla karbono urriko energien garapen teknologiko berriak egiteko eta baliozkotzeko. "30 urte baino gehiagoan zehar egindako inbertsio publiko-pribatuei esker, Espainia herrialde liderra da sektorean. Adibidez, Espainiako enpresek kontzentrazioko eguzki-energiako munduko eraikuntza berriko proiektuen % 63an parte hartzen dute".