Manu Ayerdi Garapen Ekonomikoko lehendakariordeak gaur goizean iragarri du Nafarroako ekonomiaren hazkundea bizkortu egin dela aurtengo lehenengo hiru hilabeteetan; % 0,9ko hazkundea izan du aurreko hiruhilekoarekiko, eta horrek % 3,1 arte igo du Nafarroako ekonomiaren hazkundea azkeneko urtean, aurreko hiruhilekoan baino lau hamarren gehiago.

Estatu mailan, % 0,8koa izan da Barne Produktu Gordinaren (BPG) hazkundea 2017ko lehenengo hiruhilekoan; urte arteko datua, berriz, % 3koa. Kasu bietan, Nafarroako ekonomiak erregistratutako jarduera baino puntu bat gutxiagokoa.

Ayerdi lehendakariordeak uste du gaur goizean aurkeztutako datu ekonomikoek baieztatu egiten dutela "koiunturazko beste adierazle batzuk erakusten ari zirena", hala nola Gizarte Segurantzako afiliazioek eta Biztanleria Aktiboaren Inkestak –atzo, osteguna, ezagutu genuen–, "urtarrila eta martxoa bitartean eskualdeko jarduerak izan duen indarrari" dagokionez.

Industrian, eraikuntzan eta nekazaritzako jardueretan oinarritu da 2017ko lehenengo hiruhilekoan Nafarroako ekonomiak izan duen hazkunde hori; "hiru sektore horiek hartu dute zerbitzuen lekukoa, sektore hori izan baita orain arte BPGren hazkundearen lidergoa izan duena, eta urteko lehenengo hilabete hauetan moteldu egin du bere urte arteko erritmoa", adierazi du Manu Ayerdik. Bestalde, zehaztu duenez, manufakturen barruan, urteko lehenengo hilabeteetan enplegu gehien batu duten adarrak izan dira nekazaritzako elikaduraren industria eta metalezko produktuen fabrikazioa, eta "hazkunde interesgarria" izan dute industria kimikoak eta farmazia-industriak ere.

Suspertze-zantzu "pozgarriak" eta goranzko berrikuspena

Bere mintzaldian, Ayerdi lehendakariordeak adierazi du "oso pozgarriak" direla "suspertze ekonomikoaren martxaren zantzuak". Aldi berean, onartu du hobekuntza hori zabala eta orokorra izanik, eta zer jardueretan gertatzen ari den kontuan hartuta, esan daiteke zantzu horiek "minimizatu" egiten dituztela "jarduera ekonomikoak epe laburrean bat-bateko erorialdia izateko aukerak".

Suspertze ekonomikoaren sostengu diren akuiluei buruz ere hitz egin du Manu Ayerdik. Horrela, krisiaren eztandaren aurretik gertatzen zenaren kontra –orduan eraikuntzak elikatu zuen hazkunde ekonomikoa eta zor pribatuaren metatze handia sortu zuen–, "orain, manufakturak eta zerbitzuak dira hedapenaren sostengu, eta horrek hazkundea osasuntsuagoa eta iraunkorragoa izango dela iragartzen du".