Mª José Beaumontek, Lehendakaritzako, Funtzio Publikoko, Barneko eta Justiziako kontseilariak, HeliNET mugaz haraindiko lankidetza-proiektua koordinatzeko eta plangintza egiteko lehen bileran parte hartu du gaur goizean. Horren bidez, Nafarroak, Euskadik eta Pirinio Atlantikoek heliportuen eta helikopteroetarako eremuen sare bat garatzeko asmoa dute, isolatuta edo urrun dauden Pirinioetako herritan egon daitezkeen larrialdiei erantzuteko, Espainiako eta Frantziako Estatuen arteko administrazio-mugak kontuan hartu gabe.

Horrela, aireontzien erabilera sustatuko da, esaterako, larrialdi medikoak, erreskateak edo natura-hondamenduak gertatzen badira. Beaumont kontseilariak gogoratu du egoera kritikoetan helikopteroak erabiltzea "funtsezkoa" dela ohiko komunikazio-sareetatik edo sarbide zaila duten lekuetatik urrun dauden mendiko herriei erantzuteko, "edozein direla larrialdi-zerbitzuen eta babes zibilaren jarduera baldintzatzen duten administrazio-mugak".

Era berean, proiektu honekin, mugaz haraindiko lankidetza-sare bat sortuko litzateke, bai logistikoa bai operatiboa, hiru lurraldeetako gobernu, foru aldundi, mankomunitate eta tokiko erakundeen babes zibileko, osasun eta larrialdi zerbitzuen artean, elkarrekin aritzeko eta laguntza emateko.

HeliNET proiektua Europako Interreg V-A Espainia-Frantzia-Andorra (POCTEFA 2014-2020) programaren uneko deialdian proposatu da, eta gaur egun, hautaketaren bigarren fasean dago, bere kategorian aurkeztutako hogei bat proiektuen artean bigarren kalifikaziorik onena lortu duelako.

Aurreikusita dago HeliNET proiektuak hiru urteko iraupena izatea, 2017ko uztailetik 2020ko ekainera arte, eta 2,5 milioi euroko aurrekontua du. Parte hartzen duten hiru lurraldeetako administrazioek ordainduko dute, eta % 65eko finantzazioa izan lezake Europan. Proiektuaren burua Foru Gobernuko Babes Zibileko Zerbitzua da, eta beste hauek ere parte hartzen dute: Nasuvinsa, Nafarroako Gobernuko lurzoruko enpresa publikoa; Eusko Jaurlaritzako Osakidetzako Larrialdi Zerbitzua; Berrikuntza, Ikerketa eta Osasun Fundazioa eta Baiona, Pau eta Pirinio Atlantikoetako ospitaleak (Frantzia).