Nafarroako Ogasunak Foru Komunitateari 237,9 milioi euro zor dizkioten 316 zordun handien zerrenda argitaratu du gaur bereweb-orrian. Batik bat BEZaren eta atxikipenen ordainketarekin lotuta daude, gehienak enpresa-jarduerak eta jarduera profesionalak egiten dituzten subjektuak direlako. Esan behar da argitaratutakoak geroratuta edo etenda ez dauden zorrak direla.

Zordunen % 40 higiezinen eta eraikuntza sektoretik datoz, eta zenbateko osoaren % 45 baino gehiago zor dute: 107,7 milioi euro baino gehiago. Haiengandik alde handira daude elikagaien eta banaketaren sektorea (14,3 milioi), ibilgailuen salerosketakoa (11,6 milioi), petrolio-produktuen banaketakoa (10,6 milioi) eta ostalaritza-zerbitzuetakoa (9,4 milioi).

Zerrenda honetan barne hartzen diren subjektuek 250.000 euro baino gehiagoko zerga-zorrak dituzte. 53, pertsona fisikoak dira, eta 263 juridikoak. Zordunen % 23 hartzekodunen konkurtsoan deklaratuta daude, beraz, hiru eurotatik bat, 237,9 milioi eurotatik, gaur goizean Luis Esainek, Nafarroako Ogasuneko zuzendari-kudeatzaileak jakinarazi duenaren arabera.

Konkurtso-prozesuek eragindako zorrei dagokienez, kasuak kasu merkataritza-arloko epaitegietan jarraitzen diren prozeduraren arauen arabera kudeatzen ditu zerga-erakundeak. Konkurtsoa deklaratuta ez duten hartzekodunei dagokienez, Ogasunak premiamendu-prozeduraren bidez kudeatzen du zorren kobrantza, dagozkion errekarguak eta berandutze-interesak barne. Horretarako, zenbait administrazio-baliabide ditu, hala nola egon daitezkeen ondasun eta eskubideen enbargoa, eta erantzukizuna hirugarrenei ematea, hala uzten duten premisak antzematen badira. Zorra kobratzea ezinezkoa den kasuetan, espedientea baliogabetzat hartuko da, eta azken finean, zorra preskripzioz iraungiko da, Luis Esainek jakinarazi duen moduan.

Zorrak kobratzeko jarduerak handitzeko, beste baliabide batzuk ezarri dira 2017rako Aurrekontuen Legean onartutako aurrekontu-zuzkidura gehigarriarekin, bilketaren arloan zerga-iruzurrari aurre egiteko.

Egoitza fiskalaren arabera, zordunak Nafarroako 79 herritakoak eta Foru Komunitatetik kanpoko beste herri batzuetakoak dira. Gehienak, 88, Iruñekoak dira, eta zor osoaren % 28,81 biltzen dute. Haien atzetik daude Nafarroatik kanpokoak, 17 guztira, % 5,90arekin; Tuterakoak, 15, % 6,61ekin; Mutiloakoak, 12, % 3,79rekin eta Noaingoak, 10, % 3,16rekin.