Maria Solana, Hezkuntzako kontseilaria, "Jakin-mina" programan parte hartu duten Nafarroako 45 gazteetatik 33ri diplomak banatzeko ekitaldiko buru izan da gaur goizean Nafarroako Jauregiko Tronu Aretoan. Zikloa Jakiundek antolatu du eta 2016ko azaroaren 18tik 2017ko martxoaren 31ra bitartean Nafarroako Unibertsitatean Bigarren Hezkuntzako ikasleentzat egindako bost hitzaldiz osatuta dago. Programaren seigarren edizioa da aurtengoan eta 2011. urtean abiatu zen. Solana kontseilaria izan da hitzaldi-zikloari amaiera eman diona, eta aldaketaren gobernuari buruz hitz egin du.　

Solana kontseilariarekin batera, beste hauek ere bertaratu dira ekitaldira: Jesús M. Ugalde, Jakiundeko lehendakaria; Iciar Astiasarán, Nafarroako Unibertsitateko Ikerketako errektoreordea; Ramón Gonzalo, NUPeko Ikerketako errektoreordea ;Yolanda Olasagarre, EIBZko zuzendaria eta Nafarroako Jakin-minako ohiko kolaboratzailea eta Jakeline Barker, Jakiundeko idazkaria. Horrez gain, diplomak jaso dituzten hogeita hamar ikasle baino gehiago ere izan dira.

"Jakin-mina" programaren helburua da akademikoki motibatuta dauden gazteen adimen-garapena eta garapen pertsonala azkartzea, adituek emandako hitzaldi eta erakustaldien diziplina anitzeko programa baten bidez. Hitzaldi horiek ikastetxetik kanpo ematen dira, unibertsitateetako edo ikerketa-zentroetako instalazioetan.

Tronu Aretoan egindako ekitaldian zentro hauetatik etorritako 33 ikasle izan dira haien irakasleekin batera: Altsasuko Altsasu BHI, Etxarri-Aranatzeko Andra Mari Ikastola, Burlatako Askatasuna, Erredin, Iruñeko Eunate, Garralda Institutua, Iruñeko Liceo Monjardín, Atarrabiako Pedro de Atarrabia, San Fermin Ikastola, Berako Toki Ona eta Zizur.