Nafarroako Gobernuak erabaki bat hartu du gaurko bilkuran. Horren bidez, Osasunbideko zuzendari kudeatzaileari Doneztebeko osasun-zentro berriaren lanak kontratatzeko baimena ematen dio, 3 milioi euro inguruko aurrekontuarekin. Oinarrizko eremu osoak 5.315 osasun-txartel ditu esleituta, eta horietatik, 899 pediatria-adinekoak dira.

Aurrekontuan barne hartzen dira eraikuntza-lanak berak (2.873.762 euro), obra-zuzendaritza eta segurtasun eta osasun koordinazioa (54.241 euro). Gastua hiru aurrekontu-ekitaldiri egotziko zaie: 2017 (407.550 euro), 2018 (2.343.409 euro) eta 2019 (177.043 euro).

Doneztebeko osasun-zentroa eraikin berria izango da, solairu batekoa, 1.400 m2-ko azalerarekin, eta horietatik, 1.250 m2 erabilgarriak izango dira. Lanak 2017. urte honetako azken hiruhilekoan hastea eta 2019ko lehen hiruhilekoan amaitzea aurreikusita dago.

Zerbitzu hauek emango ditu: lehen mailako arreta, erretinografia, erradiologia eta errehabilitazioa. Azken hirurak eskualdean bakarrik emango dira. Laguntza-sailak erabilera anitzeko 1 areto, 1 erradiologia areto eta 1 errehabilitaziorako gimnasio izango ditu. Horrez gain, 16 kontsulta izango ditu (3, familia-medikuntzakoak; 1, pediatriakoa; 4, erizaintzakoak; 2 laguntza berezikoak; 1, gizarte-lanekoa; 1 larrialdietarako areto; 1, kirurgia txikikoa; 1, ateratze eta proba osagarrietarako areto; 1, estimulazio goiztiarreko kontsultakoa, eta 1, albaitaritza-bulego). Laguntza-sail hau, harrera, langile eta instalazioen eremuekin osatuko da.

Guztira, 4 mediku orokor, 1 pediatra, 5 erizain, 1 gizarte-langile, 3 administrari eta Landa-eremuko Larrialdi Zerbitzuko 3 erizain izango dira lanean.

Azkenik, adierazi behar da oinarrizko eremu honek leku hauetan kontsultategiak ere badituela: Elgorriaga, Beintza-Labaien, Urrotz, Saldias, Ituren, Eratsun, Ezkurra eta Zubieta.