Osasunbideak lan eskaintza publikoaren (LEP) lehen proposamen bat aurkeztu dizkie ostegun honetan Mahai Sektorialean ordezkariak dituzten sindikatuei. Guztira, 215 plaza izango dira osasun arloko langileentzat, sindikatuen ordezkariek egiten dituzten ekarpenen zain.

LEP berri honek, erretiratu edo hil diren pertsonengatik hutsik dauden plazak betetzeko Estatuko arautegiak ezarritako mugei jarraituz dei daitezkeen plazen % 100 jasoko luke.

Proposamenaren arabera, LEP nagusiki C, D eta E mailetara mugatzen da. Deituko diren plazen % 77a erizaintzako zaintza osagarrietako teknikarientzat dira, 92 guztira, eta zeladoreentzat 75. Beste 15 plaza barrutiko fakultatibo espezialistentzat (BFE) dira, 10 erizain (horietatik, 5, Osasun Mentaleko adituentzat), 15 laborategiko teknikari espezialista (LTE), 4 osasun-dokumentazioko teknikari (ODT), 4 anatomiako teknikari espezialista (ATE) eta 4 erizaintzako teknikari laguntzaile.

Nabarmendu behar da lehen aldiz deitu direla lan-eskaintza publiko batean erizaintzako teknikari laguntzaileen plazak.

Bestalde, Osasunbideak Mahai Sektorialean jakinarazi du beste ezohiko lan-eskaintza publiko baterako deialdia egiteko asmoa duela, Estatuko Aurrekontuen Lege Orokorraren onarpenaren barruan jasotzen den aukera bat dena.

Bileran Osasunbideari atxikitako langileen osasun arazoak direla eta birkokatzeko prozedura arautzen duen Foru Dekretu proiektua ere aurkeztu dute. Nobedade nagusi gisa, prozedura arintzeko izapidetze epeak ezartzen dira, eta gehieneko epea lau hilekoa da. Salbuespen gisa, beste bi hilabete luzatu ahalko da.