Nafarroako Gobernuak dagoeneko Nekazaritza Politika Bateratuaren (NPG) 98.724.893 euroko ordainketa burutu du, Nekazaritzaren Europako Berme Funtsaren (FEAGA) kontura Nafarroako nekazariei eta abeltzainei egindako zuzeneko ordainketei dagokiena. Horrela, 12.435 titularrek kobratu dute kanpaina honetako laguntza bat edo batzuk.

Funts gehienak oinarrizko ordainketak eta ordainketa berdea izan dira. Horietako lehenengoak, 57,7 milioi eurokoa, nekazariek eta abeltzainei dituen eskubideen esleipenarekin eta aitortutako hektarea kopuruarekin lotuta dago. Ordainketa berdeak, 28,6 milioikoak, larreak mantentzea, laboreak eta interes ekologikoko azalerak dibertsifikatzea saritzen du.

Halaber, abeltzainentzat bideratutako beste laguntza batzuk nabarmentzen dira: 4,6 milioi ardi-ahuntzen sektorerako, 2,8 milioi behi-ume hazleetarako eta 2,2 milioi esnetarako behi-aziendarako.

Hauexek izan dira gainerakoak: gizentzeko behiak (647.237 euro), ardien eskubide bereziak (97.516 euro), labore proteiko eta oleaginosoak (804.321 euro), transformaziorako tomatea (379.224 euro), arroza (254.355 euro), erremolatxa (94.680 euro), fruitu oskoldunak (22.406 euro), kalitatezko lekaleak (2.915 euro), eta nekazari gazteak (374.730 euro).

2017ko kanpainari dagokionez, behin epea itxita (apirilaren 30etik maiatzaren 15era luzatu zena), erregistratutako eskaera kopurua 13.814koa izan da. Horrez gain, 106 eskaera egin zaizkio erreserba nazionalari eta 1.814 eskaera oinarrizko ordainketa-eskubideak lagatzeko.