Nafarroako Lehendakariak, Uxue Barkosek, gaur goizean nabarmendu du "Lizarrak izandako Erdi Aroko iragan bikaina, bizilagunen lanerako gogoan, adiskidetasunean eta ulermenean oinarritua" eta "Nafarroako biztanle guztien nortasuna eraikitzeko egindako ekarpena".

Horrela adierazi du Erdi Aroko Ikerlanen Nazioarteko 44. Astea inauguratzerakoan. Aste hori gaur asteartetik ostiralera (21) bitarte egingo dute Egaren hirian, eta XII. eta XV. mende artean hiriaren eta landaren artean izandako tentsio eta gatazketan oinarrituko da. Halaber, nabarmendu du, lau egun horietan zehar, "parte-hartze eta eztabaida zientifikoko foroak nazioartean garrantzi handia izango duela, eta Lizarra eta Nafarroa Europako mediebalismoaren epizentroan kokatuko dituela"; era horretan, "ideiak trukatzea eta ezagutza historikoa bultzatuko dituen esparrua" dela esan du.

Horrez gain, topaketaren nazioarteko izaera eta iaztik ikerlari gazteei eta unibertsitateko doktoregaiei beren tesiak eta ikerketa-proiektuak hedatzeko eskaintzen dien aukera aipatu nahi izan ditu. Gainera, Erdi Aroko Azterketen Espainiako Sozietatea erakunde kolaboratzaileen taldean sartzea goraipatu du.

Bestalde, Koldo Leoz alkateak Lizarrak Erdi Aroko Ikerlanen Nazioarteko Astea bultzatzearen eta indartzearen alde egindako apustua nabarmendu du.

Erdi Aroko Azterketen Nazioarteko Astearen 44. edizioan, hiri menderatzeen egiturak, nekazarien erreboltak eta tentsioak eta erresistentziak jorratuko dira egun hauetan, XII. eta XV. mendeen artean hiriaren eta landa-ingurunearen artean izandako tentsio soziala mahaigaineratu eta eztabaidatzearekin batera, Nafarroako mendian bizitako gatazka barne.

Bertan izango dira Italia, Frantzia, Erresuma Batua, Portugal eta Espainiako adituak. Euskal Herriko Unibertsitateko irakaslea eta hizlari-koordinatzailea den Juan José Larrearen hitzetan, Erdi Aroko Azterketen Astearen helburua izango da "bi eremuen arteko tentsio-modu ugari aztertzea, matxinada masiboa eta indartsua bistakoena baina ez bakarra den haietan: "isilik" erantzuteko moduak badaude eta menderatzea eta liskarra bideratzen dituzten modu instituzionalak ere bai". Era berean, aktoreak zeintzuk diren, jarduera horiek zergatik egiten dituzten, bezalako galderak erantzuten ahaleginduko dira edota eguneroko paisaian, lengoaian eta gobernuan menderatzeak eta erresistentziak hartzen dituzten moduak azaltzen.