Estrategia 7 ardatzetan bildua

Helburuak lortzeko, Planak 7 ardatzetan eratutako estrategia garatuko du: inbertsioa I+G+b publikoan eta enpresa-mailakoan; berrikuntzarako baldintza onuragarriak sortzea; nazioarteko lankidetza bultzatzea; espezializazioa (S3); Zientziaren eta Teknologiaren inguruko Legea garatzea; ezagutza laborategitik merkatura eramatea; eta Berrikuntzaren Nafarroako Sistemaren baliabideak finkatzea, bikaintasuna sustatuaz.

I+G+b publikoko inbertsioari dagokionean, ZTBPn iragarri da Nafarroako Gobernuak Komunitateko Aurrekontu Orokorren portzentaje bat jarriko duela Nafarroako sistemako I+G+b arloko agenteen jarduera sustatzeko, I+G+b arloko inbertsio pribatua bultzatzeko laguntza eta erosketa publiko berritzailearekin eta administrazioan ikerketa sustatzeko. Era berean, politika fiskalak hobetzea proposatzen du I+G+b arloko inbertsioa eta mezenasgoa areagotzeko.

Enpresen atalean, Planak enpleguan industria gogorra garatzea sustatuko du, produktuak eta zerbitzuak lehiakorrak izan daitezen munduko berritzaileenekin. Horretarako, I+G+b arloan aritzen diren enpresen kopurua gehitzeko lan egingo da, eta, aldi berean, jarduera-eremu horietan inbertsio gehiago egitea erraztuko da.

Berrikuntzak sormena, bikaintasuna eta ekintzailetza sustatzen dituzten giro suspertzaileak behar dituenez, ZTBPk baldintza onuragarriak sortu nahi ditu bokazio berritzaileak sustatze aldera. Ildo horretan, zientzietan, teknologian, matematiketan eta ingeniaritzan titulatuak eta doktoreak direnen kopurua aipatu du; horrela, gai horietan trebatzea bultzatuko da jende berritzailea izatearren eta batez ere genero femeninoan. Halaber, dibulgazio zientifikoa bultzatzea komenigarria ikusten denez, Zientziaren Museoa bideragarria den aztertuko da, Unibertsitate eta enpresekin elkarlana eginaz.

Gainera, gogoratu du Nafarroak generazio berriko azpiegitura digitalak izan behar dituela, abiadura handiko konexioak eskaintzeko ikerlariei eta enpresei, eta Gobernuak Banda Zabaleko Plana egin duela esan du, 2020rako Europako estaldura-helburuak lortzearren.

Nazioartekotzeari dagokionez, Planaren arabera, Nafarroako I+G+b programak Europakoekin batuta, sinergiak sortu ahal izango dira eta Europako deialdien itzulera hobetu. Nafarroako agenteak horietan egotea bultzatuko da eta berrikuntzan liderrak diren beste herrialdeetako eskualdeekin harreman egonkorrak izatea, ikerlarien trukatzea errazteko eta elkarrekin proiektuak egiteko.

Espezializazioan (S3), definitzen dituen eremu estrategikoak aipatzen ditu (automozioa eta mekatrofika, elikadura-katea, osasuna, energia berriztagarriak eta baliabideak, turismo integrala eta industria sortzaileak eta digitalak), horietan guztietan, garatzeko behar den zeharkako faktore gisa, ikerketa eta berrikuntza nabarmentzen direla azpimarratzeko. Halaber, ZTBPk iragartzen du Zientziaren eta Teknologiaren inguruko Legea garatuko dela, sektoreari agintze aldera Berrikuntzaren Nafarroako Sistema (BNS) sortuaz, finantzaketa bermatzeko eta Bruselak I+G+b arloko inbertsiorako ezarritako helburuak lortu ahal izateko.

Bestalde, Planak ezagutza laborategitik merkatura eramateko lau bide nagusi identifikatzen ditu: BNSko agenteen eta enpresen arteko lankidetza; oinarri teknologikoko enpresa berritzaileak sortzea (EIBTs edo spin-off), BNSko agenteen edo enpresen ekipoetatik; patenteak komertzializatzea eta horiei balioa ematea; eta, azkenik, laborategietako langile ikerlariak industriara eramatea.

Zientzia, Teknologia eta Berrikuntza Planaren estrategiaren azken ardatza bikaintasunari buruzkoa da, eta horretara bideratuko da BNSko aktoreen ikerketa eta berrikuntza lana. Helburu horrekin nazioarteko batzorde zientifikoak sustatu eta zentroak ebaluatu egingo dira, finantzaketa publikoak kontuan har ditzan horien emaitza zientifikoak, gardentasunekoak eta ekonomikoak. Horrez gain, doktore-kopurua gehitzea sustatuko da eta lankidetza estuagoa izatea agenteen artean, langileen transferentzia eta lankidetza-proiektuak eta institutu mistoak ez ezik, Nafarroako ikerlariak atzerrira prestatzera irtetea eta beste herrialdeetako talentua erakartzea ere erraztuaz.

Herritarren parte-hartzea

 Zientzia, Teknologia eta Berrikuntza Plana egiteko ehun pertsona baino gehiagok hartu dute parte; enpresa, unibertsitate, zentro teknologiko eta administrazioko ordezkariak izan dira, eta gaikako hamaika mahaitan antolatu dira: Zientzia, Teknologia eta Berrikuntza Legea; Politika fiskala; Bikaintasuna, Osasuna; Nekazaritza; Ekonomia berdea; Automozioa eta mekatronika; Enpresa-mailako I+G; Berrikuntzaren aldeko esparrua; Nazioartekotzea; eta Ekonomia digitala.

Lan-mahaietan lortutako informazioa bildu ondoren, Planaren zirriborroa egin eta herritarrei eskaini zitzaien Gobernu Irekiaren orrialdearen bitartez ekarpenak egiteko, 2016ko abenduaren 13tik 2017ko urtarrilaren 31ra bitartean. Denboraldi horretan, honako ekarpen hauek jaso ziren: Nafarroako Industriaren Elkartea (NIE, Industria Transformazioaren Klusterra), 2 ekarpen; Zabala Innovación Consulting, 3 ekarpen; Miguel Erice Lacabe ELAN-AINER, ekarpen 1; eta Landa Garapena, Ingurumena eta Toki Administrazioaren Departamentua, 8 ekarpen. Guztira, 14 ekarpen jaso dira, eta horietatik 12 osorik edo partzialki onartu dira eta 2 onartu gabe geratu dira.