Gaur goizean, Manu Ayerdi lehendakariordeak Navarra Tech Transfer funtsa aurkeztu du, Foru Komunitatean oinarri teknologikoko enpresak sor daitezen bultzatzeko eta babesteko.

Europan zein estatuan eta eskualdean I+G+Bri finantzazio-lerro gehiago emateko beharra ikusirik sortu da Navarra Tech Transfer funtsa, eta haren helburua da eragile batzuen eta besteen (enpresa, unibertsitatea eta zentro teknologikoak) arteko lankidetza sustatzea, eta enpresek I+G+Bn inberti dezaten ingurune mesedegarri bat sortzea.

Sodenak, betiere Nafarroako Gobernuko Politika Ekonomiko eta Enpresarialaren Zuzendaritza Nagusiarekin lankidetzan, ikerketa bat egin zuen identifikatzeko zer palankak ahalbidetu zezaketen eskualdean sortutako ezagutza jatorri duten oinarri teknologikoko enpresak (OTE) sortzea.

Azterketa horretatik ondorioztatzen zen, gainera, hura kudeatu beharra zegoela arrisku-kapitalaren funtsen kudeatzaile baten bidez eta, ondoren, hura CNMVn sartu behar zela. Arrazoi horrengatik egin zuen Sodenak zegokion lizitazio-prozesua, eta Clave Mayor funts-kudeatzaileari esleitu zitzaion funtsa sortzeko eta kudeatzeko prozesua, sozietate publikoaren babesarekin.

Navarra Tech Transfer 2017ko ekainean sortu eta erregistratu zen CNMVn, hasierako itxierarekin, eta inbertitzaile berriak erakartzeko sortu zenetik 12 hilabeteko epea zabaltzeari eta funtsaren behin betiko itxierari ekin zion.

Finantzatu daitezkeen proiektuak

Funtsean, garapen-fase goiztiarretan dauden edo sortu berri diren oinarri teknologikoko enpresetara eta proiektuetara bideratuko dira inbertsioak, ikerketa-zentroetan, zentro teknologikoetan, unibertsitateetan, enpresetan eta/edo hango ikerketa-taldeetan sortu direnetara, bai eta Nafarroako berrikuntza bultzatzen duten beste erakunde batzuetan sortu direnetara ere.

Proiektuen helburua izango da ikerketa eta garapen teknologikoaren emaitzak (patenteak, jabetza intelektuala, prototipoak eta ikerketaren bestelako emaitzak) komertzialki ustiatzea, emaitza horiek merkatura transferi daitezen.

Horrez gain, Nafarroako Espezializazio Adimendunaren Estrategian zehaztutako sektore estrategikoetako batekoak izan beharko dute, jarduera Nafarroan kokatu beharko dute, eta inbertsio-proiekturako enpresa-plan bat aurkeztu beharko dute.

Inbertsioaren ezaugarriak

Aurreikusten da proiektu bakoitzeko batez besteko inbertsioa 500.000　euro ingurukoa izatea, dela kapitalean parte hartuz (kopuru txiki batekin), dela partaidetzazko mailegu baten bidez, eta kalkulatzen da enpresan, gutxienez, 4-6 urtez iraungo lukeela hasierako ekarpenetik hasita.

Inbertsioak proiektu bakoitzaren egoerara eta garapen-fasera egokituko dira, eta hirugarrenek ere inbertsioan parte hartzea bilatuko da. Inbertsioak pixkanaka egingo dira, balioa sortzen den heinean eta enpresaren beharren arabera, eta milioi bat euro baino gehiago behar dituzten proiektuak finantzatu ahal izango dira zenbait fasetan.

EGEF funtsak

Nafarroako Eskualde Garapenerako Europako Funtsen (EGEF) 2014-2020ko Programa Operatiboan zehaztutakoaren barruan sartzen da inbertsio-estrategia: "enpresek berrikuntzan eta ikerketan inberti dezaten sustatzea, eta enpresen, ikerketa- eta garapen-zentroen eta goi-mailako irakaskuntzaren sektorearen arteko loturak eta sinergiak garatzea", eta haren helburua da teknologia Nafarroako unibertsitateetatik eta zentro teknologikoetatik enpresa-sektorera transferitzea.