Nafarroako Gobernuak gaurko saioan lortu dituen bi akordioren bitartez, baimena ematen zaio Ingurumeneko eta Lurraldearen Antolamenduko zuzendari nagusiari hainbat urtetarako gastuak egiteko, guztira 2.830.000　eurokoak, baso-lanetarako, naturaguneak kudeatzeko eta baso-produktuetan inbertitzeko laguntzen deialdiak susta ditzan. Deialdiok 2018ko lehenengo hiruhilekoan egingo dira.

Batetik, guztira 2.300.000　euroko gastua onartzen da 2018-2019 denboraldirako, toki-erakundeek sustatutako baso-lanei laguntzeko (2　milioi euro) eta eragile eta elkarte pribatuek sustatutakoei laguntzeko (300.000　euro). Zenbateko hori 2019ko ekitaldiaren kargura ordainduko da.

Bestetik, 80.000 euroko gastua onartzen da Nafarroako 2014-2020ko Landa Garapenerako Programan (LGP) sartuta dauden naturagune babestuak edo natur balio handikoak modu jasangarrian kudeatzeko laguntzetarako.

Laguntza horietan, ekintza hauek sartzen dira, besteak beste: larreak eta mendietako bestelako produktu naturalak hobetzeko obrak eta lanak; basoak hobetzea, bereziki haien leheneratze naturala sustatzeko; eta baso-zerbitzuetarako bideak eraikitzea. Horiez gain, hauek ere sartzen dira: basoa birpopulatzea, zurak eta egurrak aprobetxatzeko; mendietako produktuen komertzializazioa arrazionalizatzea; mendien gizarte- eta olgeta-erabilera sustatuko duten proiektuak eta obrak egitea; eta baso-jabetzen eta -kooperatiben taldeak eta elkarteak sustatzea.

Inbertsioak baso-teknologietan

Bestalde, hainbat urtetarako 450.000　euroko gastu-konpromisoa, 2018ko ekitaldiaren kargurakoa, hartzea onartzen da, baso-teknologietan eta baso-produktuen eraldaketan, mobilizazioan eta komertzializazioan inbertitzeko laguntzetarako, LGPren barruan. Laguntza horiek mendien edo baso-lursailen jabeei (publikoak zein pribatuak) zuzenduko zaizkie, bai eta baso-ustiaketen jabeei, baso-elkarteei eta baso-industriei eta -enpresei ere.

Zehazki, baso-ustiaketei aplikatzen zaien teknologia hobetzera eta zura lehen aldiz eraldatzen duten industrietara bideratuko dira laguntzak.

Gainera, laguntza publiko hori Nafarroako Baso Planetik dator; hark sektorerako duen berariazko xedea da Nafarroarentzat baso-industria egoki eta lehiakorra garatzea, eta enpresak modernizatzeko, berrikuntza teknologikorako eta proiekzio komertzialerako baldintzak sortzea, sektore horrek pisu handia izan dezan Foru Komunitatearen ekonomian, landa-eremuetako bizitza dinamiza dezan eta herrietan biztanleria aktiboa manten dezan, eta mendiak modu jasangarrian kudeatzen lagundu dezan.