2018an eta 2019an zehar, 3,5 milioi euroko inbertsioak egingo dira, eta, horiei esker, puntu garbi gehiago abian jarri ahal izango dira foru-geografia osoko 11 mankomunitatetan. Puntu garbiak Tokiko Inbertsioen Planeko funtsekin (2,8 milioi euro), Hondakinen Kontsortziokoekin eta Iruñerriko Mankomunitatekoekin (0,7 milioi euro) finantzatuko dira.

Aipatzekoa da hondakin-mota horiek zailenak direla behar bezala kudeatzeko; beraz, Foru Komunitateko puntu garbi guztietarako estrategia bera ezarriko da. Era horretan, langileek prestakuntza espezifikoa izango dute, eta sistema informatiko berritzailea jarriko da hondakinaren bizi-zikloaren segimendua egin ahal izateko.

Inaugurazio-ekitaldian honako hauek hartu dute parte: Landa-garapeneko, Ingurumeneko eta Toki Administrazioko kontseilariak, Isabel Elizaldek; Garesko alkateak, Oihan Mendok; Izarbeibarko Mankomunitateko lehendakariak, Sabina Garcíak; eta Nafarroako Hondakinen Kontsortzioko kudeatzaileak, Iñaki Urrizalkik.

Elizalde kontseilariak eskainitako hitzaldian, nabarmendu du hondakin gutxiago sortzeak eta berrerabiltzeak duen garrantzia. Ildo horretan, Nafarroako Hondakinen 2017-2027 Plana aipatu du; plan horretan kokatzen da gaur aurkeztutako zerbitzua, eta hondakinen %65a gaika biltzearen aldeko apustua egiten du. Etxeko eskala txikiko eta kudeaketa zaileko hondakinei dagokienez, garrantzitsua da era horretako instalazio-kopurua gehitzea, gehiago biltzeko eta gaika bildutako gainerakoen kalitatea hobetzeko.

Halaber, agerian utzi du Nafarroako Gobernuak neurri-mota horiekiko duen konpromisoa. Era horretan, beste ekimenen artean, Hondakinen Prebentziorako eta Ekonomia Zirkular alderako Trantsiziorako Bulego berria abian jarriko da, "Nafarroa ildo horretan erreferentziazko gizarte bilakatzen laguntzeko, lehengaien erabilera arduratsua eginaz, tokiko baliabideak ahalik eta gehien aprobetxatuaz eta murrizteko, berrerabiltzeko, konpontzeko eta birziklatzeko araua etengabeko zirkuluan aplikatuaz, naturaren beraren funtzionamendua imitatuta".

Izarbeibarko Mankomunitatetik adierazi dute, azpiegitura honekin, Larragako puntu garbia egokituta eta hainbat instalazio finko jarrita etxeko hondakin bereziak jasotzeko, era horretako hondakinak biltzeko herritarren eskaria bete nahi dela.

Ekitaldian izan dira, baita ere, Izarbeibarko Mankomunitatean sartuta dauden herrietako alkateak eta zinegotziak, erakundeko bertako langileak, udal-langileak eta hondakinen kudeatzaileak.