Osasun Departamentuak 1.995.001 euro bideratuko ditu guztira 2018an, toki-erakundeek, fundazioek eta irabazi-asmorik gabeko elkarteek prebentzioko eta osasuna sustatzeko programak egin ditzaten, izan ere, egitura horiek garrantzi handikoak dira osasuna toki-mailan sustatu ahal izateko eta Departamentuak oso ongi baloratzen du horien lana. Deialdiaren pisurik handiena drogazaletasunak eta bestelako adikzioak prebenitzeko plan eta programei dagokie, 868.000 eurorekin.

Dirulaguntzen deialdia gaur goizean aurkeztu du Osasun zuzendari Luis Gabilondok, eta harekin batera izan dira Nafarroako Osasun Publikoaren eta Lan Osasunaren Institutuko zuzendari kudeatzaile Mª José Pérez Jarauta eta Osasun-Herritartasunaren, Aseguramenduaren eta Bermeen Zerbitzuko zuzendari Lazaro Elizalde. Adierazi dutenez, dirulaguntza hauen helburua toki-erakundeek nahiz gizarte-erakundeek garatutako “interes komunitario handiko prebentzioko eta osasuna sustatzeko proiektuei” laguntzea da, ezen, halako erakundeen jarduera osasun-sistemak esparru honetan egiten duen lanaren “osagarri eta indargarria” baita.

Laguntzen deialdia gaur argitaratu da Nafarroako Aldizkari Ofizialean (NAO). Dirulaguntzak eskatzeko epea otsailaren 28an bukatuko da. Iaz egin zen bezalaxe, ahalik eta gardentasun handiena lortzeko asmoz, deialdiko oinarrien barnean diru-laguntza lerro bakoitza baloratzeko azpirizpideak sartu dira, bai eta diruz lagundu daitezkeen gehieneko moduluak ere.

Nabarmendu behar da, Nafarroako Osasun Publikoaren eta Lan Osasunaren Institutuak kudeatutako arloetan, emaitza hobeak lortzeko asmoz, gehiago baloratzen direla gai jakin bati lotutako zerbitzuek eta gizarte-erakundeek elkarrekin eta era koordinatuan gauzaturiko tokiko proiektuak, elkarte bakar batek egindakoak baino. Halaber, gehiago baloratzen dira jarduera-mota desberdinak uztartzen dituzten proiektuak.

Beste laguntza batzuk

Horren harira nabarmendu behar da aurten ez direla dirulaguntza bidez egingo deialdi honetan jasotako lan-arriskuak prebenitzeko ekintzak, baizik eta NOPLOIk kudeatuko ditu zuzen-zuzenean, horren alde bideratutako parlamentuko zuzenketa baten arabera.

Laguntza hauei gaineratu behar zaizkie, Osasun-Herritartasunaren, Aseguramenduaren eta Bermeen Zerbitzuak aurten Nafarroako Odol-Emaileen Elkarteari (Adona) eta Minbiziaren aurkako Espainiako Elkarteari (AECC) emango dizkien dirulaguntza izendunak, Petö metodoarekin tratatzen ari diren garun-paralisidun haurrentzako laguntzak, espektro autistako nahasmenak dituzten pertsonendako laguntzak edota hemofilia, C hepatitisa eta bestelako gaixotasunak dituzten pazienteentzako gizarte-laguntzak; 858.520 euro, guztira.

Halaber, Osasun Publikoaren eta Lan Osasunaren Institutuak beste bi dirulaguntza-lerro abiarazi ditu toki-erakundeei zuzendutako Zahartze aktibo eta osasungarriaren aldeko Estrategiarako, adineko pertsonekin adeitsuagoak diren herriak, hiriak eta auzoak lortzeko asmoz; 290.000 euro, guztira. Deialdi hau luze gabe argitaratuko da eta Landa-Garapeneko, Ingurumeneko eta Toki-Administrazioko Departamentuarekin batera kudeatuko da

328 erakunde onuradun 2017an

2017an, gaur aurkeztutako deialdiari atxikitako dirulaguntzen zenbatekoa 1.858.275 eurokoa izan zen. Laguntzak 328 erakunde, fundazio eta irabazi-asmorik gabeko elkartek eskuratu zituzten.

Jarduera-arloen arabera, laguntzen jasotzaileak honako hauek izan ziren: prebentzioa eta osasuna sustatzeko programa komunitarioak garatzen dituzten 166 erakunde; adikzioak prebenitzeko programetan lan egiten duten 45 udal erakunde (horietako bat dugu Iruñeko Udala, nafar hiriburuko 9 auzotan garatzen ari diren 7 proiektu aurkeztu baitzituen); sustapen eta heziketa afektibo-sexual komunitarioa sustatzeko proiektuak garatzen dituzten 39 organismo; pazienteen eta senideen 38 elkarte; substantziarekiko nahiz substantziarik gabeko adikzioen prebentzioan lan egiten duten 16 elkarte; lan-arriskuak prebenitzeko programak dituzten 15 organismo; komunitate ijitoarekin lan egiten duten 7 elkarte; eta GIB-HIESaren bidezko infekzioari lotutako programa komunitarioak dituzten bi erakunde.