Horren harira, Estatuko energia Institutuak Txantreako bi proiektu espezifiko sartu ditu ‘Europa egiteko modu bat’ izenburupean landu duen praktika onen gidan: Orvinako Urrotz kaleko 25ean eta Valtierra kaleko 21ean kokatutako eraikinetan gauzaturikoak. Zazpi eta zortzi solairu dituzten eraikinak dira, 1971n eraikitakoak, eta IDAEk bertan gauzaturiko inguratzaile termiko osoa hobetzeko sistemak aipatu ditu esku-hartzeen eredu gisa.

Zaharberritzearen ondoren, bi eraikinetako etxebizitzek lau eta bi letrako hobekuntza lortu zuten, hurrenez hurren, kalifikazio energetikoaren sailkapenean. Era berean, Orvinan zaharberritutako eraikinetan ziurtatu den energia aurrezkia 3.186 MWh/urtekoa eta 254.880 euro/urtekoa izan da.

IDAEren gidak “FEDER funtsen inpaktua bistaratu nahi du kofinantzaturiko jarduketen praktika onen hautaketaren bitartez”, eta Txantreako jarduketei buruzko azterlanean, auzoko birgaikuntza energetikorako proiektuan baliatutako metodologiaren, teknologiaren nahiz prozesu eta zerbitzuen osagai berritzaileak nabarmendu ditu. Hartara, Institutuaren txostenak berariaz azpimarratu ditu “enpresa publikoaren inplikazioa inbertsio pribatuko jarduketak sustatzeko, eta bizilagunei soluzio eta laguntzei buruzko aholkularitza emateko auzoan irekitako bulegoa”, eraikinen birgaikuntza energetikorako zein berikuntza-sareak berritzeko proiektuak abian jartzen lagundu duten elementuen artean.

Txantreako birgaikuntza energetikorako proiektuaren lehen fasean, 13,2 milioi euroko guztizko inbertsioa mobilizatu da, eta kopuru horren bi heren, gutxi gorabehera, laguntza publikoetatik bildu dira; horren harira, Nafarroako Gobernuak 4 milioi euro inguruko ekarpena egin du. Beste laguntza batzuk IDAEk FEDER europar funtsen laguntzaz garatutako PAREER programari atxikita daude.

Parte-hartze bidezko kudeaketa sistema

Txantrearako bisitaldian, Efidistrict proiektua koordinatu duen Ana Bretaña de la Torre Nasuvinsako arkitektoak nabarmendu du, “inbertsioetatik harantzago, garrantzitsuena eta berritzaileena auzokide-komunitateekin, teknikariekin eta garrantzi handiko erraztaile lana egin duen administrazio publikoarekin batera garatu dugun parte-hartze bidezko kudeaketa sistema izan da”.

Halaber, Bretaña de la Torrek Txantreako hainbat esparrutako birgaikuntza integralaren bigarren fasean aurreikusita dauden jarduketak azaldu dizkie IDAEko teknikariei, izan ere, 59 ataritako eta 972 etxebizitzatako auzokide-komunitateekin akordioak gauzatzeko asmoa dago, 2020an hainbat proiektu gauzatuko dituen anbizio handiko programa honen bitartez. Horretarako, 22 milioi eurotik gorako inbertsioa aurreikusi da, azken urte eta erdi honetan mobilizatutako kopuruak ia bikoiztuz.

Bigarren fasearen garapena bukatzen denean –Txantreako hainbat esparruk osatzen dute jarduketa-eremua-, auzoan dauden 5.000tik gora etxebizitzen herenak zaharberrituta egongo dira. Orvinako doreen kasuan –hemen Nasuvinsaren jarduketak areagotu dira-, etxebizitzen hiru laurdenak zaharberrituta daude.

Bestalde, Txantreako auzoan aurreikusita dagoen eraikinen zaharberritze eta berokuntza-sareen berritze programa zabalaren giltzarrizko osagai gisa, Nasuvinsa Bero Zentral baten instalazioa bultzatzen ari da. Horren eraikuntza, instalazio eta kudeaketa lizitazio publikora aterako da datozen asteotan. Azpiegitura honek baso-biomasa erabiliko du nagusiki energia-iturri berriztagarri eta iraunkor gisa, eta Txantreako 4.000 etxebizitza baino gehiago hornitzeko prestatuta dago, mugakide diren Burlata eta Antsoain herrietako etxebizitzak barne.