Heldu den larunbatean, abenduak 1, HIESaren aurkako Munduko Eguna ospatuko dela eta, Osasun Departamentuak, prebentzioaren garrantzia gogoratuz, dei egin die herritarrei eta bereziki gazteei, sexu-harremanetan senez joka dezaten preserbatiboa erabiliz, eta GIB detektatzeko proba egin dezaten.

Sexu-Transmisiozko Infekzioak (STI) osasun publikoaren arloko arazo garrantzitsua dira mundu osoan. Azken hamarkadan, sifilis eta gonokozia kasuen kopurua dexente igo da Estatuan eta Nafarroan, beste STI batzuekin batera. GIBek eragindako infekzioa, gure artean STIen artean sailkatuta dagoena, 41 kasu berrirekin egonkortu da Nafarroan 2017an.

HIESaren epidemia hasi zenetik 2017ko abendura arte, GIBek eragindako 2.093 infekzio diagnostikatu dira Nafarroan bizi diren herritarren artean; gehienak, 80ko hamarkadaren bukaeran eta 90ko hamarkadaren hasieran. Geroztik, tasa murriztuz joan zen, 2008an izandako 100.000 biztanleko 4,5 kasuko gutxieneko mailara iritsi arte, Nafarroako Osasun Publikoaren eta Lan Osasunaren Institutuaren (NOPLOI) 100. Txostenean zehaztu denez.

Azken bost urteetan diagnostikatutako GIB kasu berrien % 81 gizonei dagokie. Kopuru honen % 68 gizonen arteko babesik gabeko sexu-harremanekin lotuta dago, eta bigarren transmisio kategoria babesik gabeko harreman heterosexualak dira (% 25), injektaturiko drogen kontsumoari kasuen % 5 baizik ez dagokiolarik.

Emakumeen artean, babesik gabeko harreman heterosexualen nagusitasuna asko ere nabariagoa da (% 93), eta injektaturiko drogen kontsumoari atxikitako transmisioa tasa ere % 5ekoa da.

Azken bost urteetan diagnostikatutako GIB kasu berrien % 89 15 eta 54 urte bitarteko pertsonei dagokie, eta intzidentzia handieneko adin-tartea 35 eta 44 urte bitartekoada, GIB diagnostikoak adin-tarte guztietan eman ziren arren.

Diagnostikoen % 40 berankorra izan da, hots, GIBek eragindako infekzioa HIESarekin batera diagnostikatu da. Honek esan nahi du kutsatuta dauden pertsona askok ez dakitela oraindik gaixotasuna hartu dutenik, eta ondorioz, kutsatzen jarraitzeko arriskua duela, 2,7 kasu berri eraginez pertsona bakoitzeko, eta aldi berean, ez direla profitatzen beste eritasun batzuk hartu edo hiltzeko aukerak murriztuko lizkieketen tratamenduez.

Egun, babesik gabeko sexu-harremanak dira transmisioen kausa nagusia, epidemiaren hasieran ez bezala, izan ere, garai hartan drogak injektatzeko materiala partekatzeagatik transmititzen zen nagusiki.