Koordinazioa eta Lege berria

Kontseilariak Toki Erakundeekiko koordinazio programa azpimarratu du, Nafarroako Toki Polizia guztiak Foruzaingoaren informazio sistemetan txertatzen dituena, esku-hartzeetan sintonia handiagoa erraztuz eta polizia-lanen prozeduren homologazioa bultzatuz, “ekintzen estaldura nahiz operadore desberdinei eskainitako laguntza eta segurtasuna areagotuz”. Ildo horretan, oinarrizko prestakuntza ziklo hau “Nafarroako polizien arteko koordinazioaren balio handiko eredua” dela esan du.

Beaumontek eskerrak eman dizkio Funtzio Publikoko eta Barneko zuzendaritza nagusietako pertsonalari egindako lanagatik, horiexei atxikita baitaude Segurtasun eta Larrialdi Eskola, Poliziaren etorkizuneko profesionalen hautaketa eta prestakuntza prozesuaren azken katebegia, eta Furozaingorako oposizioen zein toki erakundeetako polizietarako hautaketa proben epaimahai kalifikatzaileak.

Azkenik, egun tresna berri bat erabil daitekeela gogoratu du, Nafarroako Poliziei buruzko azaroaren 19ko 23/2018 Foru Legea, eta honek “polizia integrala lortzearen alde hasitako bidean aurrera egiten lagunduko digu”, esan du.

Ikastaroaren edukia

Bestalde, Nafarroako Segurtasun eta Larrialdi Eskolako zuzendari Izaskun Cibiriáinek, pertsonen segurtasunarekin zerikusia duten alderdi guztietan Eskolak ematen duen zeharkako formakuntza nabarmendu du, izan ere, Nafarroako polizia guztietako pertsonalari zuzendutako formakuntza ematen du, udaltzaingoak, suhiltzaileak, babes zibileko profesionalak eta azken bi horietako boluntarioak barne harturik.

Cibiriáinek ikastaroaren ezaugarriak zehaztu ditu: 975 eskola-ordu Eskolako lokaletan, Foruzaingoaren nahiz Iruñeko Udaltzaingoaren instalazioetan eta kanpoko beste agerraldi batzuetan. Horrez gain, formakuntza hartu dute Polizia eta Larrialdietako Euskal Akademian eta praktikak egin dituzte egiazko lanpostuetan.

Ikastaroak zortzi modulu izan ditu, eta lehenengoa ‘Polizia Komunitario eta Asistentziala’ deritzona izan da, Genero Berdintasuna, Aniztasunerako Arreta, Herritarrekiko Harremanak edo Polizia-Bitartekaritza bestelako formakuntza-unitateak tarteko. Bigarrenak, ‘Poliziaren eginkizuna eta funtzioak’ izenburupean, Nafarroako Segurtasun Publikoaren sistema, poliziaren antolaketa eta funtzioa eta Etika eta Deontologia profesionalak izan ditu aztergai.

Hirugarren eta laugarren moduluetan, Prebentzioa, Babesa eta Poliziaren Esku-hartzeari buruzko alderdi teknikoak landu dira, esparru profesional hutsari loturiko gaiak.

Bosgarren modulua, Juridikoa eta Polizia-Ikerketari buruzkoa, poliziaren lanari dagozkion ekintzak garatzeko modu egokiari buruzko Arau Esparrua lantzeko izan da. Seigarren moduluan, aldiz, Poliziaren Ezaguerak eta Trebetasunak ikasi dira. Informazio teknologiaren erabileratik, prestaketa fisikoraino edo ibilgailuen gidatzeraino, euskarazko zein ingelesezko hizkera teknikoa barne harturik, betiere herritarrekiko komunikazioa hobetzeko xedez.

Azkenik, programan “funtseko” bi modulu landu dira: Praktikak eta Jarrera. Praktikek 352 orduko iraupena izan dute, lanpostuari dagozkion funtzioak eta zereginak behar bezala ikasteko eta garatzeko xedez. Hainbat polizia zerbitzutan egin dira, ez bakarrik aurreikusita dagoen helburuko zerbitzuan, une oro profesionalen laguntzaz.

Ekitaldiaren bukaeran, Foruzaingoko eta Toki Polizietako agente berriek ohiko txapel jaurtiketa egin zuten.