Legearen egitura

Legeak 63 artikulu ditu bost kapitulutan banatuta, baita bost xedapen gehigarri, xedapen indargabetzaile bat eta bost azken xedapen ere.

I. Tituluan, Legearen helburua, aplikazio-esparrua eta definizioak jaso dira. Gainera, botere publikoen jardunari buruzko hainbat printzipio arautu eta elkarteak aitortu ditu berdintasuna sustatu eta emakumeen eskubideak defendatzeko alde interesdun gisa.

II. Tituluak “Berdintasun Sistemaren” antolaketa finkatu du, gai honekin zerikusia duten administrazio publiko guztiak eta emakumeen elkarteak nahiz talde feministak kide dituzten koordinazio egiturak barne hartuz. Halaber, NABIren eginkizuna indartu du, Nafarroako politika publiko guztiei dagokien berdintasun printzipioaren zeharkakotasuna eta genero ikuspegiaren aplikazioaren bermatzaile gisa. Azkenik, Berdintasunaren Unitateak arautu eta Nafarroako Berdintasunerako Kontseilua berdintasunari buruzko aholkularitza eta partaidetzarako organo izendatu du.

III. Tituluan, berdintasun printzipioa bermatzeko mekanismoak zehaztu dira, administrazio publikoen jardunean eta ekintza positiboak abiarazterakoan zeharkako aplikazioa egin dadila aginduz. Zehatz-mehatz finkatu dira zeintzuk diren berdintasun printzipiuoa zeharka aplikatzeko mekanimoak; hala nola, Berdintasunerako Plan Estrategikoa, administrazioen arteko lankidetza eta koordinazioa, kontratazio publikoa, laguntza publikoak, estatistikak eta azterlanak, pertsonalaren gaikuntza, genero inpaktuari buruzko txostena edo genero ikuspegia duten aurrekontuak.

IV. Tituluak genero berdintasuna hainbat esku-hartze esparrutan sustatzeko neurriak arautu ditu. Titulu honek lau kapitulu ditu: Lehendabizikoak, herritar aktiboei buruzkoak, neskei eta emakumeei esparru politiko nahiz sozialean era aktiboan parte hartzeko aukera erraztuko dien esparrua finkatu du, emakumeen elkartegintza zein kirol arloko ahalduntzea eta partaidetza sustatuz, besteak beste. Bigarren kapituluan, ezagutza ardatz gisa hartuta, hezkuntza, kultura eta komunikazioari erreparatu eta emakume sortzaileen eginkizuna bistaratu, emakumeen kultur-jarduera saritu eta kultur inguruneetara duten sarbidea errazteko beharra nabarmendu da. III. kapituluak, bizi-iraunkortasuna aintzakotzat harturik, enplegu politika erantzunkideak bultzatzea du xede eta zaintzaileen jardunaren nahiz denboren erabileraren garrantzia nabarmendu du. Kapitulu honetan, genero ikuspegia osasunaren arloan, gizarte inklusioan, esku-hartze komunitarioan eta garapenerako lankidetzan txertatzeko beharra ere aztertu da, bizi-iraunkortasunerako gakoak diren aldetik. Azkenik, IV. kapituluan, lurralde iraunkorrari erreparatu zaio garapen iraunkorreko 2030eko helburuen arabera.

Azkenik, V. Tituluak Zigor Araubidea zehaztu du.

Legearen elaborazioa

2017an, Herritarrekiko eta Erakundeekiko Harremanetako Departamentuak, Nafarroako Berdintasunerako Institutuaren (NABI) bitartez, zirriborroa lantzeko prozesua abiarazi zuen.

Lehendabizi, egoeraren diagnosia egin zen, Gobernuko departamentuek, beste iturri kualitatibo batzuek eta giltzarrizko informatzaileek emandako informazioan oinarrituta, genero eten nagusiak detektatzeko.

Lege berrirako esparrua zehazten zuen Oinarrizko Dokumentua lantzeko, gai honi buruzko nazioarteko arauak eta Espainiako legeria aztertu ziren. Testua profesionalen zein herritarren partaidetzara ireki zen. Gainera, ekarpen telematikoak bildu eta taldekako bilerak antolatu ziren profesionalekin eta elkarteekin, dokumentuaren idazketarako proposamenak egin zitzatzen, guztira 400 iradokin inguru jaso zirelarik.

Hortik aurrera, gure komunitaterako emakumeen eta gizonen arteko berdintasunari buruzko Foru Lege Aurreproiektua landu eta jendaurreko erakusketara ireki zen berriz ere iazko irailean, entitateek, alderdi politikoek, erakundeek eta Nafarroako Gobernuko departamentuek egindako 317 ekarpen bildu zirelarik.

Azkenik, Nafarroako Berdintasunerako Kontseiluaren oniritziaz, Nafarroako Gobernuak Lege Proiektua onartu zuen abenduaren 26ko bileran.