Ayerdik datu horien balorazio koalitatiboa egin du. Izan ere, zifrak aurreko urtekoen antzekoak diren arren, “turismoaren aldeko apustua egiteak ez du soilik turista gehiago esan nahi, turismo hobea baizik: urtean zehar eta gure lurralde osoan hobeto banaturik egonen den turismoa, alegia”.

Nafarroak FITUR 2019ra eraman duen baliabide nagusia den gastronomiarekin lotuz, “gero eta mundu globalizatuagoan eta irekiagoan, jendeak, bidaiatzen duenean, tokiko nortasunean eta kulturan oinarrituriko esperientzia bizi nahi izatearen” paradoxa azpimarratu du Ayerdik.

Izan ere, gastronomiak esperientzia hori eskaintzen du, eta hori da Turismoari buruzko Nafarroako 2018-2025 Plan Estrategikoak azpimarratzen duen balio nagusietakoa, Nafarroako kulturan zentratuz: “Turistak toki mailako esperientzien bila joaten dira jomugetara, horien bitartez kultura horretan hurbiltasunez eta era ez estandarizatuan murgiltzeko”.

Horrez gain, Ayerdi presidenteordeak turismo gastronomikoak mahai ona gainditzen duen turismoaren dimentsioa nabarmendu du: “bidaia batean plater edo ardo on batez gozatzea baino askoz gehiago da. Ondare kulturalera hurbiltzeko era da, eta modu erabat pertsonalean egitea”. Horrela, gogorarazi duenez, Munduko Turismo Erakundeak turismo gastronomikoaz egin duen bigarren txostenak esaten duenez, kultur eskaintza, natura eta gastronomia dira, ordena horretan, turistak toki bat bisitatzera daramatzaten arrazoi nagusiak. “Badakigu gaur egun esperientzia gastronomikoa museo bat bisitatzea, musikaz gozatzea edo toki bateko arkitektura mirestea bezain garrantzitsua dela. Turismo gastronomikoa egiten duenak ez du produktu bat kontsumitzen, historia bat, hari loturiko bizitza estilo bat, kontsumitzen du”, esan du.

Gastronomiak bertze sektore batzuetan dituen inplikazioak ere aipatu ditu, ez soilik ostalaritzan, baita nekazaritzan eta abeltzaintzan, merkataritzan, eta herri txikiagoen aktibazioan ere. “Beraz, Nafarroan ere, nazioarteko turismo gastronomikoaren gorakada hori baliatu nahi dugu, toki mailako turismoa bultzatzeko eta horrelako turistak erakartzeko”, esan du amaitzeko.

Mendiko gastronomia, Erdigunea eta Erribera, FITUR 2019ko irekiera

Mendiak, Erdiguneak eta Erriberak protagonismo handia izanen dute FITURren edizio honetan, Nafarroako Gobernuak Turismo eta Merkataritza Zuzendaritza Nagusitik aurrera eramango dituen aurkezpenen bitartez. Horrela, “Catar Paisajes” izeneko aurkezpen gastronomikoaren ondoren, datorren otsailaren 21ean eta 22an, urteen poderioz Nafarroako turismo sektorearen barruan jadanik finkaturik dagoen Navartur Azokaren 14. edizioan eginen den Turismo Gastronomikoko Nazioarteko II. Kongresuaren (FoodTrex Navarra) aurkezpen ofiziala etorriko da.

Gastronomia izanen da Nafarroak FITURren izanen duen standean urtarrilaren 23an eginen diren aurkezpenen protagonista nagusia. 17:00etan, Carlos Rodríguez barman nafarra izanen da Bartender eta Zerbitzari Profesionalen 66. Kongresu Nazionalaren aurkezpen ofizialeko enbaxadorea. Nafarroako Barmanen Elkarteak, Barman Federazioarekin lankidetzan, antolaturik azaroaren 24tik 29ra Iruñean ospatuko den kongresu horren aurrerapena izanen da. Ekitaldi horretan hainbat txapelketa ospatuko dira, eta baita Nafarroako Jatorri Izendapeneko Ardoz eginiko I. Koktel Txapelketa ere. Ekitaldi horretan, kongresuko partaideek Erriberi, Arbizu eta Etxarri Aranatz bisitatu ahal izanen dituzte.

Mundu osoko nazioarteko turismo azoka garrantzitsuenetakoa izanik, FITUR erakusleihoa izanen da Nafarroarentzat berriro ere. Iaz azokak 251.000 partaide izan zituen, eta horietatik 10.190 turismo sektoreko enpresak izan ziren (140.120 profesional). FITUR 2018ko asteburuan, larunbatean eta igandean, 110.860 pertsona hurbildu ziren bertara. Erakusleihoa handiagoa da urtetik urtera. Iazko edizioan 165 herrialde eta 4.600 komunikabide baino gehiagok hartu zuten parte.

Foru Komunitatearen standa

FITURreko edizio honetan Nafarroak, turismo arduratsua erreibindikatzen duen 500,5 metro karratuko gunea prestatu du, erlaxatzean, gozamenean eta esperientzia berrien aurkikuntzan bikaintasuna eskatzen duen turistaren bila.

Horretarako prestatu den gunerako sarbideko zoruan led pantaila handia instalatu da, bertan Nafarroako kultur eta natur baliabide nagusiei buruzko ikus eta entzun esperientziak proiektatzeko.

Standaren sarreran informazio erakusmahaiak daude, eta horien atzean dago aurkezpenetarako gunea, Nafarroako Turismoaren irudi korporatiboarekin. Ostean zerbitzu eta ostalaritza gunea, eta fondoan, bilera profesionaletarako tokia. Bertan izanen da, ostiralean, urtarrilaren 25ean, FITURren eginen den Nafarroako Eguneko ekitaldi instituzionala.

Espazioa eta guneen arteko bereizketak egitura linealez daude osaturik, modernotasun sentsazioa emanez, haritz kolorea erabiliz, Nafarroako basoen irudikapen gisa, zenbait elementu berde ere azpimarratuz. Standak euskarri grafiko ugari izanen ditu, Foru Komunitateko turismoaren zenbait ikono irudikatuz.

FITUR 2019ko Nafarroako standa (9C13) IFEMA Azoka Guneko 9. pabiloian egonen da aurten ere. Standa Madrilgo “Proyect Arte Producciones S.L.” enpresak egin eta muntatu du, eta nazio mailako azoka hauetarako egokituko da: NAVARTUR Iruñean (otsaila), B-TRAVEL Azoka Bartzelonan (apirila), EXPOVACACIONES Azoka Bilbon (maiatza) eta INTUR Azoka Valladoliden (azaroa).

Nafarroako Eguna eta FITURreko gainerako aurkezpenak

Urtarrilaren 23ko aurkezpen gastronomikoei, turismo sektoreko adar guztiak bilduko dituen aukera zabala gehituko zaie. Nafarroako Gobernuko Turismo eta Merkataritza Zuzendaritza Nagusiak jarduera programa zabala prestatu du Nafarroako stand instituzionalean. Jardunaldi nagusia ostiralean, urtarrilaren 25ean, izanen da, Nafarroako Eguna ospatuz. Uxue Barkos Foru Komunitateko presidentea izanen da egun horretako ekitaldi instituzionalaren buru, eta horren ondoren, “Cata Paisajes” ekitaldian aurkeztu ziren Nafarroako produktuen dastatze errepikapena egonen da.

Aurkezpen gehienak ostegunean, urtarrilaren 24an izanen dira. Jardunaldia goizeko 11:00etan hasiko da, Vianako Udalak Viana Fundazioaren VIII. Mendeurrenaren barruan jasotzen diren jardunaldiak aurkeztuz. “2019an Viana bisitatzeko 800 arrazoi” izenburuarekin, udalerri horretako Udalak, ostatu eta ostalaritza sektoreekin eta bidaia agentziekin batera, turismoaren sustapenerako antolatu dituen jarduerak aurkeztuko ditu.

11:30ean, Instituto Navarro de Tecnologías e Infraestructuras Agroalimentarias (INTIA) izenekoak, “Nafarroako gastronomiatik, kulturatik eta naturatik bidaia” aurkeztuko du Overtrails tour operadorearekin batera. Ekimenaren helburua tokiko produktua eta ekoizleak bertakoei eta bisitariei hurbiltzea da, eta Iruñeko Tokiko Produktuaren Astean (urriaren 12ko zubian) eginen da.

12:00etan, Nafarroako Ostalaritza Elkarteak (AEHN), Iruñeko eta Nafarroako 2019ko Produktu Turistikoen Katalogoa aurkeztuko du. Bertan, Nafarroako ehunka enpresek gastronomiaren, ostatuen, enologiaren, kulturaren, naturaren, motorraren, zirkuituaren eta ibilbideen eta, jakina, Donejakue Bidearen gainean aurkeztu dituzten proposamenak biltzen dira. Azken hori izan zen, hain zuzen ere, FITURren aurreko edizioan Nafarroako Komunitatearen ikurretako bat eta eginiko sustapenaren ardatza.

12:30ean, Overtrailsek Flamenco On Fire jaialdiaren aurtengo edizioa aurkeztuko du. Musika genero horrekin Nafarroan egiten den hitzordua ezinbertzekoa bilakatu da jadanik komunitateko udan. Jaialdiaren antolatzaileekin batera, Nafarroako Gobernuak, jaialdiaren inguruan antolatzen den aukera zabala aurkeztuko du: bisitak, ibilaldiak, ikuskizunetarako sarrerak, balkoiak alokatzeko zerbitzua, eta baita Iruñeko ijito erkidegoarekin kontaktua eta kultura eta gastronomia ere. Jaialdia 2019ko abuztuaren 20tik 25era eginen da.

13:00etan, Tierras de Iranzuk, Reyno Gourmetekin elkarlanean, Irantzuko Monastegira egiten diren bisita antzeztuak aurkeztuko ditu. 2019ko apiriletik ekainera izanen dira. Nafarroako ondare gotorlekua omentzeko ekimena, Irantzu Ibaiaren Kanoian egiten diren Eko-ibilbide Antzeztu Mitologikoekin eta ekainaren 2an ospatuko den “Erromanikoa, dantza eta ardoa Irantzuko Monastegian” ekitaldiarekin osatuko da. Ekitaldi guzti hauetan Reyno Gourmeteko produktuen dastaketak ere izanen dira.

Arratsaldean Goi Erriberako Udalen txanda izanen da. Martzillako, Funeseko, Azkoiengo eta Faltzeseko Udalek “Goi Erriberako Bide Berdea” aurkeztuko dute, Arga eta Aragon ibaien ertzetatik lau herriak lotzen dituen 40 kilometro baino gehiagoko ibilbidea.

Ordu erdi geroago, Nafarroako standak Baztan – Bidasoako Ederbidearen, Txirrindularitza eta Ibilbide Maparen, aurkezpen ekitaldia jasoko du. Proiektuak, Nafarroa iparraldean bizikletaz egin daitezkeen 12 ibilbide eta bide sare zabala jasotzen ditu, eta horrekin batera Baztan – Bidasoako Baliabideen Gida ere aurkeztuko da.

17:00etan, Tierras de Javier Turismo Partzuergoak, Xabierreko Lurrak izeneko lurraldean zehar banaturik egonen diren 4 Nordic Walking Zentroak aurkeztuko ditu. Xabier, La Bizkaia (Oibar, Leatxe, Sada), Kaparreta (Caseda eta Galipentzu) eta Santa Agata (Ayesa, Eslava eta Lerga). Merkatu nitxo berri aitzindariak kirol turismoa kulturarekin, gastronomiarekin eta osasunarekin uztartzeko aukera emango du, eta urte osoan gozatu ahal izanen da.

Ostegunerako aurkezpenak Zona Media Turismo Partzuergoak itxiko ditu, “Nafarroako Ardoen Ibilbidea” Produktu Klubaren aurkezpenarekin. Ardoaren kultura eta bere inguruko guztia sustatzen duten upategien eta turismo establezimenduen aukeraketa zaindua: aisia, natura eta kultura, eta xehetasunez ikusi ahal izanen da duela denbora gutxi berriztatu den Nafarroako Ardoen Ibilbidea webgunean.

Halaber, Foru Komunitateak protagonismoa izanen du FITUR Saluden (8. Pabiloiko 8B35 standa). Gero eta indar gehiago hartzen ari den sektorean erreferentziazko plataforma da, eta Foru lurraldea arlo horretako erreferentziazko jomuga da. Segmentu horretan osasunarekin eta ongizatearekin erlazionaturiko turismoa biltzen da, eta FITUR honetan B2B workshop bat izanen du, preskriptore medikoentzat, osasun arlokoentzat eta bidaia agentzientzat.

Nafarroak FITUR Cinen ere hartuko du parte, 2. Pabiloiko C10 standean, eta bertan zine eta turismo industriak elkartuko ditu. Oraingo honetan, hiru atal handi zine industriara egonen dira zuzendurik: zine turismoarekin erlazionaturiko erakusketa gunea, merkataritza topaketak bultzatzeko B2B gunea, eta Spain Film Commission izenekoak antolaturiko hitzaldiak eginen diren agertokia.