Helburu nagusiak

Pertsona ardatz duen arreta eredu integral eta kolaboratiborako sarbidea bermatzea da planaren helburu orokorra, honako helburu nagusi hauen inguruan:

• Ahultasunaren detekzio eta esku-hartze goiztiarra lehenestea, gaitasun funtzionalaren berreskuratzea eta mantentzea indartuz, mendekotasuna prebenitzeko edo horren bilakaera moteltzeko.

• Egoitzetako adinekoen beharrei buruzko hasierako ebaluazio bateratua eta beharren araberako profilaren sailkapena egitea, Klinikoen Estrategian sartzeko irizpideak betetzen dituztenak lehenentsiz eta Ebaluazio Geriatriko Integrala aplikatuz.

• Paziente bakoitzari beharren araberako aldizkako arreta programatua bermatzea.

• Egoitza-zentroetako adinekoei Osasun Departamentuak ezarritako protokolo sanitario berberak aplikatuko zaizkiela bermatzea. Kronikoen programa, zainketa aringarriak, gaitasun funtzionalaren hobekuntza, etxeko ospitalizazioa eta abar.

• Egoitza-zentroetako pertsonal sanitarioa propioaren formakuntza indartzea, zehaztutako zerbitzuaren ordutegian Lehen Mailako Arretari dagozkion funtzioak betetzeko gauza izan dadin.

• Erakunde eta atal desberdinetako pertsonalaren formakuntza indartzea zahartzaroko psikopatologian, portaera-asalduren arretan eta murrizketa fisiko eta farmakologikoen saihestean.

Aldeen erantzukizunak eta konpromisoak

Eskubide Sozialetako Departamentuari dagokio egoitza-zentroek izan beharreko pertsonal sanitario propioaren ratioak ezarri, horien finantzaketa segurtatu, helburuak, betebeharak eta eginkizunak zehaztu eta zentroek aurreikusitako jarduerei esleitu beharreko denbora eta baliabideak eskaintzen dizkietela gainbegiratzeko erantzukizuna.

Egoitza-zentroak pertsonal sanitarioa kontratatzeaz arduratuko dira Eskubide Sozialetako Departamentuak ezarritako ratioen arabera, eta pertsonal horrek Lehen Mailako Arretako funtzioak bereganatuko duela ziurtatuko dute, adinekoentzako osasun arreta Osasun Departamentuak zehazturiko protokolo eta eredu bereberen arabera garatzen dela bermatzeaz gain. Halaber, pertsonal sanitarioak Lehen Mailako Arretako Historia Kliniko Elektronikoa bete beharko du, eta horretarako, egoitza-zentroek aldez aurreko hitzarmen espezifikoa sinatu eta dagozkion baimen informatuak bildu beharko dituzte, datuak babesteko araudian ezarritakoa betez.

Bestalde, Osasun Departamentua, Eskubide Sozialetako Departamentuak ezarritako betebeharrak edo ordutegi-mugak gainditzeagatik egoitza-zentroetako pertsonalak estali gabe utzitako osasun zerbitzuak emateaz arduratuko da, honako konpromiso hauek ere aintzakotzat hartuz:

• O-NOZeko pertsonalaren bitartez, mediku propioa ez duten adinekoei eman beharreko arreta segurtatzea, nahierakoa zein programatutakoa eta aldizkakoa.

• Medikuaren iritziz, Larrialdi Zerbitzuetan ohiko ordutegiaz kanpoko berariazko jarraipen klinikoa behar duten pazienteen arreta jarraitua bermatzea.

• Lehen Mailako Arretan zein Arreta Espezializatuan arreta ez-presentziala indartzea.

• Egoitza-zentroei hornitu beharreko osasun material eta produktuen katalogoa onartzea.

• Laresko egoitza-zentroetan aurreikusita zegoen Farmaziako Inplementazio Plana zabaltzen jarraitzea.

• Historia kliniko elektronikoaren maneiua, kronikoei buruzko protokoloak, zahartzaroko psikopatologia, portaera-asalduren arreta eta murrizketa fisiko eta farmalogikoak saihestea tarteko dituen Formakuntza Plana diseinatu eta finantzatzea.

• Funts dokumentaletarako online sarbidea eskaintzea, protokolo klinikoak, liburutegi birtuala eta formakuntza programa barne harturik, besteak beste.

Informazioa, koordinazioa eta jarraipena

Sinatzaileek erabakitakoaren arabera, Informazio Soziosanitarioko Sistemei buruzko talde teknikoa sortuko dute, pertsonen historia eta datu-baseei buruzko informazio eta ebaluazio sistema partekatu berriak garatzeko, identifikazio txartelen erabilpen sistematikoa bultzatzeko eta programaren ebaluaziorako adierazle berriak garatzeko.

Etengabeko eta kalitateko osasun arreta bermatzeko, koordinazio sistema berriak finkatu dira bi erakundeen menpeko profesionalen artean: zuzendaritza taldeen arteko aldizkako bilerak, kasuak baloratzeko eta kudeatzeko bilerak, saio klinikoak, baterako irakaskuntza jarduerak, eta abar.

Azkenik, hartutako konpromisoak betetzen direla zaintzeko, hitzarmenean dagokion jarraipen batzordearen eraketa aurreikusi da, 2na ordezkari bilduz O-NOZen, Pertsonen Autonomiarako eta Garapenerako Nafarroako Agentziaren eta Lares Elkartearen izenean.